اسسٹنٹ کمشنر کھاریاں احمد شیر گوندل نے رمضان سہولت بازار کا دورہ کیا اور وہاں دستیاب اشیائے ضروریہ کی قیمتوں، معیار اور دستیابی کا تفصیلی جائزہ لیا۔
کھاریاں: اسسٹنٹ کمشنر کھاریاں احمد شیر گوندل نے رمضان سہولت بازار کا دورہ کرتے ہوئے وہاں دستیاب اشیائے ضروریہ کی قیمتوں، معیار اور دستیابی کا تفصیلی جائزہ لیا۔ انہوں نے مختلف اسٹالز کا معائنہ کرتے ہوئے آٹا، چینی، سبزیاں، پھل اور دیگر روزمرہ اشیاء کی قیمتوں اور کوالٹی کو چیک کیا۔
اس موقع پر انہوں نے متعلقہ افسران کو ہدایت دی کہ رمضان بازار میں اشیاء کی تسلسل کے ساتھ فراہمی یقینی بنائی جائے اور کسی بھی قسم کی گرانفروشی یا ذخیرہ اندوزی کو فوری طور پر روکا جائے۔ اسسٹنٹ کمشنر نے شہریوں سے بھی گفتگو کی اور سہولت بازار میں فراہم کی جانے والی اشیاء اور انتظامات کے بارے میں ان کی رائے حاصل کی۔
احمد شیر گوندل نے کہا کہ وزیر اعلیٰ پنجاب کی ہدایت کے مطابق رمضان بازاروں میں عوام کو سستی اور معیاری اشیاء کی فراہمی اولین ترجیح ہے۔ انہوں نے عملے کو ہدایت دی کہ روزانہ کی بنیاد پر قیمتوں اور معیار کی سخت مانیٹرنگ کی جائے تاکہ عوام کو زیادہ سے زیادہ سہولت فراہم کی جا سکے۔
