گجرات میں گرانفروشی کے خلاف کریک ڈاؤن، متعدد گرفتار، لاکھوں روپے جرمانہ۔
گجرات: ضلعی انتظامیہ کی جانب سے گرانفروشی اور ذخیرہ اندوزی کے خلاف سخت کارروائیاں جاری ہیں۔ یکم مارچ سے 12 مارچ 2025 تک کی گئی کارروائیوں میں 18,928 انسپکشنز مکمل کی گئیں، جن کے دوران 66 مقدمات درج اور 45 افراد کو گرفتار کیا گیا۔
ڈپٹی کمشنر گجرات صفدر حسین ورک کے مطابق، پرائس کنٹرول مہم کے دوران مختلف خلاف ورزیوں پر 22 لاکھ 19 ہزار روپے کے جرمانے عائد کیے گئے، جبکہ مجموعی طور پر 5,210 خلاف ورزیاں رپورٹ ہوئیں۔ انسپکشن ٹیموں نے موقع پر 403 افراد کو جرمانہ بھی کیا۔
ڈی سی گجرات نے ہدایت کی ہے کہ پرائس کنٹرول مجسٹریٹس روزانہ کی بنیاد پر مارکیٹوں کی سخت نگرانی کریں تاکہ عوام کو سرکاری نرخوں پر معیاری اشیاء کی دستیابی یقینی بنائی جا سکے۔ انہوں نے واضح کیا کہ ناجائز منافع خوری اور ذخیرہ اندوزی کسی صورت برداشت نہیں کی جائے گی، اور عوامی شکایات پر فوری کارروائی عمل میں لائی جائے گی۔
