انٹرنیشنل کرکٹ کونسل نے ون ڈے پلیئرز رینکنگ جاری کر دی۔
انٹرنیشنل کرکٹ کونسل (آئی سی سی) نے تازہ ترین ون ڈے پلیئرز رینکنگ جاری کر دی، جس میں بھارتی بلے باز شبمن گل بدستور پہلی پوزیشن پر موجود ہیں، جبکہ پاکستانی کپتان بابر اعظم دوسرے نمبر پر برقرار ہیں۔ رینکنگ میں بھارتی کپتان روہت شرما نے دو درجے ترقی حاصل کر کے تیسری پوزیشن حاصل کر لی، جبکہ جنوبی افریقہ کے ہینرک کلاسن چوتھے اور ویرات کوہلی پانچویں نمبر پر ہیں۔
بولرز کی رینکنگ میں سری لنکا کے مہیش تھیکشانہ پہلی پوزیشن پر موجود ہیں، جبکہ نیوزی لینڈ کے کپتان مچل سینٹنر شاندار کارکردگی کے بعد چھٹے سے دوسرے نمبر پر آ گئے۔ بھارتی اسپنر کلدیپ یادیو نے تین درجے ترقی کر کے تیسری پوزیشن حاصل کی، جنوبی افریقہ کے کیشو مہراج چوتھے اور نامیبیا کے برنارڈ اسکالٹز پانچویں نمبر پر موجود ہیں۔ پاکستانی فاسٹ باؤلر شاہین شاہ آفریدی نویں نمبر پر موجود ہیں۔
آل راؤنڈرز کی رینکنگ میں افغانستان کے عظمت اللہ عمرزئی پہلی، محمد نبی دوسری اور زمبابوے کے سکندر رضا تیسری پوزیشن پر موجود ہیں، جبکہ نیوزی لینڈ کے مچل سینٹنر ایک درجہ بہتری کے بعد چوتھے نمبر پر پہنچ گئے۔
چیمپئنز ٹرافی 2025 کے فائنلسٹ بھارت اور نیوزی لینڈ کی آئی سی سی ون ڈے رینکنگ میں نمایاں ترقی دیکھنے میں آئی ہے، جبکہ پاکستان کے شاہین شاہ آفریدی ٹاپ 10 باؤلرز میں شامل ہیں۔
