بالی ووڈ کے سپر اسٹار سلمان خان کی فلم ’سکندر‘ کا شمار ان فلموں میں ہوتا ہے جن کا شائقین بےصبری سے انتظار کر رہے ہیں۔ طویل عرصے سے سرخیوں میں رہنے والی یہ فلم بلآخر عید الفطر 2025 پر ریلیز کی جائے گی۔
بھارتی میڈیا رپورٹس کے مطابق سلمان خان نے اس فلم کے لیے 120 کروڑ بھارتی روپے معاوضہ وصول کیا ہے، تاہم یہ واضح نہیں کہ انہوں نے پروفٹ شیئرنگ ماڈل اختیار کیا ہے یا نہیں۔
ساجد ناڈیاڈوالا کی پروڈکشن میں بننے والی اس فلم کے ہدایت کار اے آر مروگادوس ہیں، جب کہ فلم کا مجموعی بجٹ 400 کروڑ بھارتی روپے ہے۔
رپورٹس کے مطابق فلم میں سلمان خان کے ساتھ اداکارہ رشمیکا منڈانا مرکزی کردار میں نظر آئیں گی، جو پہلی بار ان کے ساتھ اسکرین شیئر کر رہی ہیں۔
رشمیکا نے مبینہ طور پر فلم کے لیے 5 کروڑ بھارتی روپے وصول کیے، جب کہ اداکارہ کاجول اگروال کو 3 کروڑ روپے معاوضہ دیا گیا ہے۔
چند روز قبل فلم کا گانا زہرہ جبیں کا ٹیزر جاری کیا گیا تھا، جس میں سلمان خان اور رشمیکا منڈانا کی شاندار پرفارمنس کو بےحد سراہا جا رہا ہے۔
حال ہی میں سلمان خان نے اپنے سوشل میڈیا ہینڈل پر فلم کا ایک نیا پوسٹر شیئر کیا اور تصدیق کی کہ”سکندر“ 28 مارچ 2025 کو عید الفطر پر سنیما گھروں کی زینت بنے گی۔
