گجرات (نیوز الرٹ) وزیر اعلیٰ پنجاب مریم نواز شریف کی ہدایات پر عمل کرتے ہوئے ڈپٹی کمشنر گجرات صفدر حسین ورک نے رمضان سہولت بازار کا دورہ کیا اور وہاں فراہم کی جانے والی سہولیات، اشیائے خوردونوش کی قیمتوں اور معیار کا تفصیلی جائزہ لیا۔
میڈیا سے گفتگو کرتے ہوئے ڈپٹی کمشنر نے کہا کہ رمضان المبارک کے دوران عوام کو معیاری اور سستی اشیاء کی فراہمی حکومت پنجاب کی اولین ترجیح ہے۔ تمام تحصیلوں میں قائم رمضان بازاروں میں آٹا، چینی، گھی، دالیں، پھل اور سبزیاں رعایتی نرخوں پر دستیاب ہیں۔
انہوں نے مزید کہا کہ ناجائز منافع خوری اور ذخیرہ اندوزی کے خلاف سخت کارروائی کی جا رہی ہے، جبکہ قیمتوں کو کنٹرول میں رکھنے کے لیے سخت اقدامات کیے گئے ہیں۔ رمضان بازاروں میں خریداروں کی سہولت کے لیے صفائی، سکیورٹی، پارکنگ اور دیگر انتظامات کو یقینی بنایا جا رہا ہے تاکہ عوام آسانی اور سکون کے ساتھ خریداری کر سکیں۔
ڈپٹی کمشنر نے متعلقہ افسران کو ہدایت کی کہ رمضان بازاروں میں روزانہ کی بنیاد پر قیمتوں اور اشیاء کے معیار کی نگرانی کی جائے اور کسی بھی شکایت کا فوری ازالہ کیا جائے۔ اس سلسلے میں شکایتی مراکز بھی قائم کیے گئے ہیں، جہاں شہری اپنی شکایات درج کرا سکتے ہیں۔
اس موقع پر متعلقہ محکموں کے افسران بھی موجود تھے، جنہوں نے رمضان بازار کی کارکردگی پر تفصیلی بریفنگ دی۔ ڈپٹی کمشنر نے واضح کیا کہ رمضان المبارک کے دوران کسی بھی قسم کی کوتاہی برداشت نہیں کی جائے گی اور عوام کو زیادہ سے زیادہ ریلیف فراہم کرنے کے لیے ہر ممکن اقدامات کیے جائیں گے۔
