اسرائیل کے شمالی شہر حیفا میں بس اڈے پر چاقو بردار نوجوان کی جانب سے مسافروں پر حملہ کردیا گیا۔
غیر ملکی میڈیا کے مطابق عینی شاہدین نے بتایا کہ حملہ آور ایک بس سے اترا اور اللہ اکبر کا نعرہ لگا کر بس کے انتظار میں کھڑے مسافروں پر چاقو کے وار کیے۔
حملے میں ایک 60 سالہ مسافر ہلاک جب کہ 4 شدید زخمی ہوگئے، جن میں سے 3 کی حالت نازک ہونے کی وجہ سے ہلاکتوں میں اضافے کا خدشہ ہے۔
سیکیورٹی گارڈ کی جانب سے فوری کارروائی کرتے ہوئے چاقو بردار حملہ آور کو گولیاں مار کر قتل کردیا گیا، جس کی شناخت اسرائیلی شہری کے طور پر ہوئی ہے۔
حملہ آور کا تعلق اسرائیل کی دروز کمیونٹی سے ہے اور وہ مبینہ طور پر جرمنی کی شہریت بھی رکھتا ہے۔
قریبی دکانداروں کے مطابق حملہ آور کا نام یترو شاہین اور اس کی عمر 20 سال ہے تاہم سرکاری سطح پر نام ظاہر نہیں کیا گیا۔
اسکے بعد اسرائیلی سیکیورٹی فورسز نے حملہ آور کے گھر پر چھاپہ مارا اور اہل خانہ سے پوچھ گچھ کی تاہم کوئی گرفتاری عمل میں نہیں لائی گئی۔
واضح رہے کہ گزشتہ روز بھی ایک بس اسٹاپ پر حملہ آور نے مسافروں پر اپنی کار چڑھا دی تھی جس میں 13 افراد زخمی ہوئے تھے۔
پولیس اہلکاروں نے کار سوار حملہ آور کو پکڑنے کی کوشش کی جس پر اس نے چاقو سے وار کیے، جواب میں پولیس نے فائرنگ کرکے حملہ آور کو ہلاک کردیا۔
