اسلام آباد، جی ڈی اے رہنما فہمیدہ مرزا کا کہنا ہے کہ پاکستان کا نظام عالمی سطح پر مذاق بن چکا ہے۔
اپوزیشن کی قومی کانفرنس سے خطاب کے دوران فہمیدہ مرزا نے کہا کہ ملک میں غلامی کی نشانیاں ختم کرنی ہوں گی، میڈیا کو آزاد ہونا ہوگا۔
فہمیدہ مرزا کا کہنا ہے کہ اس کانفرنس کے لئے راستے روکے گئے، ہم مسائل کا حل نکالنا چاہتے ہیں، میں پاکستان کی پارٹی کی ہوں، ملکی ادارے کو مضبوط کرنا ہوگا چاہے وہ فوج ہو یا عدلیہ ہو۔
جی ڈی اے رہنما کا کہنا ہے کہ سب کو نظر آرہا ہے ایوان کون چلا رہا ہے؟ نوجوان مایوس ہورہے ہیں، بین الاقوامی سطح پر ہم مذاق بن گئے ہیں، خدارا! ملک کے حال پر رحم کریں۔
دوسری جانب صدر مملکت آصف علی زرداری کا کہنا ہے کہ اتحادی حکومت کیساتھ چلنا ہماری مجبوری ہے، جانتا ہوں تحریری معاہدے کے نکات پر عملدرآمد نہیں ہو رہا۔
صدر آصف علی زرداری سے پیپلز پارٹی پنجاب کے پارلیمانی وفد کے ارکان اور تنظیمی رہنماؤں کی جانب سے گورنر ہاؤس لاہور میں ملاقات کی گئی، ذرائع کا بتانا ہے کہ پارٹی رہنماؤں نے آصف زرداری کے سامنے شکایات کے انبار لگا دیے۔
