کراچی، نوجوان مصطفیٰ عامر کو اغوا کے بعد قتل کرنیوالا ملزم ارمغان انسداد دہشتگردی عدالت میں بے ہوش ہوگیا۔
کراچی کی انسداد دہشتگردی عدالت میں مصطفیٰ عامر قتل کیس کی سماعت ہوئی، جس سلسلے میں پولیس کی جانب سے ملزم ارمغان کو عدالت نمبر 2 میں پیش کیا گیا، تاہم سماعت کے دوران ملزم ارمغان عدالت میں بے ہوش ہوگیا۔
سماعت کے دوران عدالت کی جانب سے سوال کیا گیا کہ ملزم کی طرف سے کون آیا ہے؟ اس پر وکیل صفائی نے کہا ملزم سے وکالت نامہ دستخط کروانا ہے مگر ارمغان نے وکالت نامے پر دستخط سے انکار کردیا۔
عدالت نے ملزم سے سوال کیا پولیس نے جب پکڑا اس کے بارے میں کیا کہتے ہیں؟ اس پر ملزم ارمغان کا کہنا ہے کہ مجھے مارا گیا ہے۔
عدالت نے سوال کیا کہ لاش مل گئی ہے؟ اس پر تفتیشی افسر نے بتایا کہ باڈی مل گئی ہے اور قبر کشائی کا آرڈر بھی ہوگیا ہے۔
تفتیشی افسر نے عدالت میں کہا کہ ملزم سے آلہ قتل برآمد کرنا ہے ریمانڈ دیا جائے۔
اسکے بعد عدالت کی جانب سے تفتیش کے لیے ملزم ارمغان کو 4 روزہ جسمانی ریمانڈ پر پولیس کے حوالے کردیا گیا۔
