راولپنڈی، بانی پی ٹی آئی عمران خان اور ان کی زوجہ بشریٰ بی بی کیخلاف توشہ خانہ کیس کی سماعت بغیر کارروائی 27 فروری ملتوی کردی گئی۔
سپیشل جج سینٹرل شاہ رخ ارجمند کی جانب سے عمران خان اور بشریٰ بی بی کیخلاف کیس کی سماعت ملتوی کردی گئی، عمران خان کے وکیل کی جانب سے تصدیق کی گئی کہ عدالتی عملہ نے صبح باضابطہ طور پر کیس کی سماعت ملتوی ہونے سے متعلق آگاہ کیا۔
یاد رہے کہ کیس میں مجموعی طور پر 8 گواہوں کے بیانات قلمبند جبکہ 7 گواہوں پر جرح مکمل ہو چکی ہے، گزشتہ سماعت پر آٹھویں گواہ پر بانی پی ٹی آئی کے وکیل کی جانب سے جرح کی گئی تھی۔
واضح رہے کہ عمران خان کے وکیل کی جانب سے جیل ٹرائل کی بجائے اوپن ٹرائل کی درخواست بھی عدالت میں دائر ہے، درخواست میں اوپن ٹرائل کی درخواست پر فیصلہ ہونے تک توشہ خانہ کیس کی سماعت کو روکنے کی استدعا کی گئی تھی۔
اوپن ٹرائل کی درخواست پر عدالت نے فریقین کو نوٹس جاری کر رکھے ہیں، درخواست میں سپرنٹنڈنٹ اڈیالہ جیل، ایف آئی اے اور محکمہ داخلہ پنجاب کو فریق بنایا گیا ہے۔
