حیدرآباد، سٹیزن کالونی کے ایک گھرمیں آتشزدگی کے نتیجے میں معروف سندھی شاعر آکاش انصاری جان کی بازی ہار گئے۔
ریسکیو حکام کا بتانا ہے کہ سٹیزن کالونی کے ایک گھر میں آگ لگی جس کے نتیجے میں ایک شخص جاں بحق ہوگیا۔
پولیس کے مطابق آگ سے جھلس کر جاں بحق ہونے والے شخص کی شناخت معروف سندھی شاعر آکاش انصاری کے نام سے ہوئی۔
پولیس کے مطابق شاعر آکاش انصاری کی لاش کا پوسٹ مارٹم کیا جائے گا، غیر فطری موت کا میڈیکل ایگزامن اور پوسٹ مارٹم ضروری ہے اور پوسٹ مارٹم کے لیے میت واپس لیاقت یونیورسٹی اسپتال لائی جارہی ہے۔
پولیس حکام کا بتانا ہے کہ ڈاکٹرآکاش کے اہل خانہ ان کی میت تدفین کیلئے بدین لے گئے تھے۔
ڈاکٹرآکاش انصاری کے منہ بولے بیٹے لطیف آکاش نے کہا کہ صبح آگ لگنے کا واقعہ پیش آیا، کمرے کا دروازہ کھولا تو ڈاکٹرآکاش بیڈ سے نیچے گرے ہوئے تھے، اندر جانے کی کوشش کی تو میرے پاؤں جل گئے۔
دوسری جانب وزیراعلیٰ سندھ کی جانب سے شاعرآکاش انصاری کی خدمات کو خراج عقیدت پیش کیا گیا، انہوں نے گھرمیں آگ لگنے کے واقعے کی تحقیقات کی ہدایت کردی۔
