48
آزاد کشمیر سپریم کورٹ نے سابق وزیراعظم سردار تنویر الیاس کی نااہلی ختم کردی۔
سابق وزیراعظم آزاد کشمیر سردار تنویر الیاس کی نااہلی ختم ہو گئی، سپریم کورٹ آزاد کشمیر نے انہیں ایک ماہ بعد انتخاب میں حصہ لینے کے لیے اہل قرار دے دیا۔
سپریم کورٹ آزاد کشمیر میں سردار تنویر الیاس کے خلاف توہین عدالت کی کارروائی ختم کر دی گئی، جبکہ آزاد کشمیر ہائی کورٹ سے نااہلی کے خلاف دائر اپیل بھی نمٹا دی گئی۔
اپریل 2023 میں عدالت نے انہیں توہین عدالت کا مرتکب قرار دیتے ہوئے دو سال کے لیے نااہل کر دیا تھا، جس کے نتیجے میں ان کی وزارت عظمیٰ اور حکومت ختم ہو گئی تھی۔
سردار تنویر الیاس نے ہائی کورٹ کے فیصلے کے خلاف سپریم کورٹ میں اپیل دائر کر رکھی تھی، جہاں انہوں نے عدالت کی جانب سے جاری کردہ توہین عدالت کے نوٹس پر معافی مانگ لی۔ ان کے خلاف ایک تقریر کی بنیاد پر سپریم کورٹ اور ہائی کورٹ نے بیک وقت توہین عدالت کے نوٹس جاری کیے تھے۔
