اسلام آباد، وفاقی وزیر منصوبہ بندی احسن اقبال کا کہنا ہے کہ حکومت نے دن رات محنت کرکے ملک کو ڈیفالٹ سے بچایا۔
یوم تعمیر و ترقی کے موقع پر تقریب سے خطاب کے دوران وفاقی وزیر احسن اقبال نے کہا کہ اپریل 2022 میں ملک کے ڈیفالٹ کی باتیں کی جارہی تھیں، وزیراعظم کی قیادت میں حکومت نے دن رات محنت اور سیاست قربان کرکے ملک کو ڈیفالٹ سے بچایا۔
احسن اقبال نے کہا کہ حکومت کے اقدامات سے غیرملکی سرمایہ کاری میں اضافہ ہو رہا ہے، سیاسی استحکام، پالیسیوں کا تسلسل نہ ہونے کی وجہ سے ہم پیچھے رہ گئے، ایک اناڑی نے ملکی تباہی میں کوئی کسر نہیں چھوڑی، 4 سال میں ملکی ترقی کا راستہ روکا گیا۔
وفاقی وزیر منصوبہ بندی نے کہا کہ نوجوانوں سے روزگار چھین لیا گیا، تحریک انصاف کے دور حکومت میں کوئی ترقیاتی منصوبہ شروع نہیں کیا گیا، ملک میں ایسا کوئی منصوبہ نہیں جس پر بانی پی ٹی آئی کا نام ہو، ملک کے ہر بڑے منصوبے پر نواز شریف کی تختی لگی ہوئی ہے۔
احسن اقبال کا کہنا ہے کہ مسلم لیگ ن نے ملکی تعمیر و ترقی کا سفر دوبارہ شروع کردیا ہے، دھاندلی کا رونا رونے والوں نے 4 سال میں پاکستان کو کیا دیا؟ ہم سوشل میڈیا کی سیاست نہیں، خدمت کی سیاست کرتے ہیں،عوام کارکردگی کو ووٹ دیتے ہیں۔
پاکستان دوبارہ ترقی کی جانب گامزن ہے، عمران خان نے ڈیڑھ کروڑ نوکریوں، لاکھوں گھروں کی تعمیرکا جھوٹا وعدہ کیا، ان لوگوں کا رونا دھونا جاری رہے گا، تحریک انصاف والوں کو ملکی ترقی ہضم نہیں ہورہی ہے۔
وفاقی وزیر منصوبہ بندی نے مزید کہا کہ چیمپئنز ٹرافی کے موقع پر پی ٹی آئی پھر احتجاج اور سازش کررہی ہے۔
