سیالکوٹ، وزیر دفاع خواجہ آصف کا کہنا ہے کہ تحریک انصاف کو دوبارہ 9 مئی اور 26 نومبر برپا نہیں کرنے دینگے۔
سیالکوٹ میں پریس کانفرنس کے دوران وزیر دفاع خواجہ آصف نے کہا کہ پی ٹی آئی احتجاج اور فساد کی سیاست کررہی ہے، ایک اور 9 مئی اور 26 نومبر برپا کرنے کی اجازت نہیں دی جا سکتی، اگر پُرامن احتجاج کیا جائے تو ہمیں کوئی اعتراض نہیں، پی ٹی آئی کا ہر جلوس اور احتجاج پُرتشدد ہوتا ہے۔
خواجہ آصف نے کہا کہ پہلے ہی کہا تھا مذاکرات کا کوئی نتیجہ نہیں نکلے گا، پی ٹی آئی مذاکرات مذاکرات کھیل رہی تھی، پی ٹی آئی اور اسٹیبلشمنٹ میں مذاکرات کا حقیقت سے کوئی تعلق نہیں، تحریک انصاف اپنے ورکرز کو جھوٹے دلاسے دے رہی ہے۔
خواجہ آصف نے کہا کہ وزیراعلیٰ علی امین گنڈاپور کا بیان ہے ان کے 99 فیصد مطالبات منظور ہو گئے ہیں، اگر پی ٹی آئی کے 99 فیصد مطالبات منظور ہو گئے ہیں تو احتجاج کس بات کا کیا جا رہا ہے؟ 26 نومبر کو بھی سرکاری ملازمین کو احتجاج میں لایا گیا تھا۔
لیگی رہنما کا کہنا ہے کہ ماضی میں سابق وزیراعظم نواز شریف، بینظیر بھٹو کی حکومتیں کئی بار ہٹائی گئیں، لیکن ہم نے ریاست پر ہاتھ نہیں ڈالا، قوم کی یادگاروں کو نقصان نہیں پہنچایا، پی ٹی آئی عالمی سطح پر پاکستان کو بدنام کرنے کی کوششوں کے بجائے سیاسی انداز میں کام کرے۔
وزیر دفاع نے کہا کہ پہلے شور مچا ٹرمپ آئے گا اور بانی باہر آجائیں گے، ٹرمپ تو آگیا لیکن ان کا کچھ نہیں بنا، پاکستان آئے ہوئے امریکی شخص نے کہا کہ یہ لوگ ماہانہ 3 سے 4 ملین ڈالر لابنگ پر خرچ کر رہے ہیں۔
دوسری جانب مشیر اطلاعات خیبر پختونخوا بیرسٹر ڈاکٹر سیف کا کہنا ہے کہ حکومت کی بنیادیں کھوکھلی ہو چکی ہیں، اب صرف ایک دھکا درکار ہے۔
