لاہور، وزیر اطلاعات پنجاب عظمیٰ بخاری کا کہنا ہے کہ صوابی کے جلسے میں زہریلی تقریروں کے سوا کچھ نہیں ہوگا، خیبرپختونخوا کے عوام کو 12 سال میں صرف فتنہ اور فساد ملا ہے۔
لاہور میں پریس کانفرنس کے دوران صوبائی وزیر عظمیٰ بخاری نے کہا کہ پاکستان کے عوام آج یوم تعمیر و ترقی منا رہے ہیں، دوسری طرف سیاسی ٹولہ یوم سیاہ منا رہا ہے، ان کے پاس سوائے رونے دھونے کے اور کچھ نہیں ہے۔
عظمیٰ بخاری نے کہا کہ کچھ سال پہلے اداروں کیخلاف سازشیں کی جا رہی تھیں، مخالفین کو سیاسی انتقام کا نشانہ بنایا جا رہا تھا، پنجاب میں مریم نواز کی حکومت بننے سے عوام کو ریلیف ملا، پنجاب کے بچوں کو سکالر شپس دی گئیں، بجلی بلوں میں ریلیف دیا گیا، خدمت کارڈ جیسی سہولت ملی، پنجاب کی اقلیتوں کیلئے مینارٹی کارڈ متعارف کرایا گیا۔
سینئر صوبائی وزیر نے کہا کہ پنجاب کے عوام کیلئے متعدد منصوبے شروع کئے گئے، دوسری طرف ایسی جماعت بھی ہے جس کے مقدر میں صرف رونا ہے، یہ خود بھی روتے ہیں اور عوام کو بھی رونے پر مجبور کرتے ہیں، ان کی ایک صوبے میں حکومت ہے وہاں کے عوام کو کیا ملا، کے پی کے عوام کے ریلیف کیلئے ایک بھی منصوبہ نہیں دیا گیا، کے پی کے عوام کو کرپشن اور مہنگائی ملی۔
عظمیٰ بخاری کا کہنا ہے کہ کل قذافی سٹیڈیم میں ایک شاندار تقریب کا انعقاد ہوا، ہمارے بچوں کو ایسے ایونٹس کی ضرورت ہے نہ کہ پٹرول بموں کی، قذافی سٹیڈیم میں میچز کیلئے سکیورٹی کے انتظامات وزیراعلیٰ خود دیکھ رہی ہیں، ماضی میں سٹیڈیمز کو بھی اپنی سیاست کیلئے استعمال کیا گیا، نوجوانوں کیلئے کھیلوں کے میدان آباد ہونے چاہئیں۔
لیگی رہنما نے کہا کہ وزیراعلیٰ مریم نواز خیبرپختونخوا اور بلوچستان کے بچوں کو بھی سکالر شپس دیں گی، ایک سیاسی ٹولہ یوم سیاہ منا رہا ہے، ان کے پاس سوائے رونے دھونے کے اور کچھ نہیں ہے، یہ آج صوابی میں جلسہ کر رہے ہیں، سرکاری وسائل کا بے دریغ استعمال ہو رہا ہے، علی امین گنڈاپور بتائیں کہ انہوں نے آج تک صوبے کیلئے کیا کیا؟
سینئر ن لیگی رہنما کا کہنا ہے کہ مسلم لیگ ن کی حکومت دیگر صوبوں میں ترقی دیکھنا چاہتی ہے، انہوں نے بس صوبے کے پیسوں کو ذاتی مفاد کیلئے استعمال کرنا ہے، چند لوگ زبردستی بانی کو مقبول قرار دینے پر تلے ہوئے ہیں، بانی پی ٹی آئی و عمران خان کی کال پر کوئی بھی باہر نہیں نکلا، ان کے اپنے ایم این ایز اور ایم پی ایز گھروں میں بیٹھے ہیں، عوام کو ان کے دھرنوں میں کوئی دلچسپی نہیں ہے۔
صوبائی وزیر نے کہا کہ مخالفین کے مطابق پورے ملک میں الیکشن غلط اور خیبرپختونخوا میں درست ہوئے، وزیراعلیٰ نے1 سال میں اتنا کام کیا جتنا کوئی حکومت 5 سال میں بھی نہیں کرسکی، نگہبان رمضان پیکیج کے تحت 10 ہزار روپے مستحق خاندانوں کو دیئے جائیں گے، پیکیج میں رجسٹریشن کی آخری تاریخ 15 فروری ہے، پیکیج کے تحت لوگوں کو ان کے گھروں میں پے آرڈرز پہنچائے جائیں گے۔
