راولپنڈی، سابق خاتون اوّل بشریٰ بی بی کی جانب سے حالیہ احتجاج کے مقدمات میں شامل تفتیش ہونے سے انکار کردیا گیا۔
بشریٰ بی بی کو راولپنڈی میں درج مقدمات میں شامل تفتیش کرنے کے لئے پولیس ٹیمیں جیل پہنچیں اور حالیہ احتجاج کے 10 مقدمات میں انہیں باضابطہ طور پر شامل تفتیش کر لیا گیا۔
سابق خاتون اوّل کی جانب سے پولیس کی ابتدائی تفتیش میں بیان دینے سے انکار کردیاگیا، بشریٰ بی بی نے پولیس کے سوالوں کے جوابات عمران خان سے مشاورت سے مشروط کردیئے۔
اسکے بعد بانی پی ٹی آئی عمران خان کی زوجہ بشریٰ بی بی کو اڈیالہ جیل میں 26 نومبر کے بعد درج ہونے والے 31 مقدمات کی سماعت کے سلسلے میں جج امجد علی شاہ کی عدالت میں پیش کیا گیا۔
بشریٰ بی بی کا کہنا ہے کہ شامل تفتیش ہونے سے پہلے شوہر عمران خان اور اپنے وکیل سلمان صفدر سے مشاورت کرنی ہے، مشاورت کے بعد اپنا بیان ریکارڈ کروانے کے لیے تیار ہوں، بانی پی ٹی آئی اور وکیل سلمان صفدر سے اگر آج ملاقات کروا دی جائے تو آج ہی شامل تفتیش ہونے کو تیار ہوں۔
بشریٰ بی بی نے عدالت سے بانی پی ٹی آئی عمران خان کی موجودگی میں شامل تفتیش ہونے کی بھی درخواست کی جس پر عدالت نے ایس او پیز کے مطابق بشریٰ بی بی کی عمران خان اور ان کے وکیل سے ملاقات کروانے کا حکم دے دیا اور کیس کی مزید سماعت 7 مارچ تک ملتوی کردی۔
دوسری جانب شمالی وزیرستان کے علاقے دتہ خیل میں مارا گیا دہشتگرد افغان شہری نکلا جو ملک میں ہونیوالے دہشتگردی کے واقعات میں افغان شہریوں کے ملوث ہونے کا ایک اور ناقابل تردید ثبوت ہے۔
