مظفرآباد، سابق وزیراعظم آزاد جموں کشمیر سردار تنویر الیاس کا کہنا ہے کہ مقبوضہ جموں کشمیر بارے آرمی چیف جنرل سید عاصم منیر کے بیان کا خیر مقدم کرتے ہیں۔
سینٹرل یونین آف جرنلسٹس فورم میں گفتگو کے دوران سابق وزیر اعظم آزاد جموں و کشمیر سردار تنویر الیاس خان نے کہا کہ پوری قوم پاک فوج کے سربراہ جنرل سید عاصم منیر کے مقبوضہ جموں کشمیر کے حوالے سے ’’دس جنگیں لڑنے“ کے بیان کا خیر مقدم کرتی ہے۔
سابق وزیراعظم آزاد جموں کشمیر کا کہنا ہے کہ آرمی چیف کی طرف سے یوم یکجہتی کشمیر کے موقع پر دارالحکومت مظفرآباد میں دیئے گئے بیان سے لائن آف کنٹرول کے دونوں اطراف بسنے والے کشمیریوں کو ایک نیا حوصلہ ملا ہے۔
سردار تنویر الیاس نے کہا کہ سپہ سالار کے اس بیان نے نہ صرف پانچ اگست 2019 کے بعد مقبوضہ کشمیر کی عوام میں پھیلی مایوسی کا خاتمہ کر دیا، بلکہ اب ایک نئے عزم کے ساتھ پاکستان اور آزاد کشمیر کے لوگ مقبوضہ جموں کشمیر کی آزادی کے لئے نئی صف بندیاں بھی کریں گے۔
سابق وزیراعظم آزاد کشمیر کا کہنا ہے کہ آرمی چیف نے جس دلیری کے ساتھ کہا کہ’’پاکستان مقبوضہ جموں کشمیر کے لئے پہلے تین جنگیں لڑ چکا ہے اور مزید دس جنگیں بھی لڑے گا ‘‘ در اصل یہ پاکستان کی عسکری طاقت اور اعلیٰ دفاعی صلاحیتوں کا کھلا اظہار تھا، یوم یکجہتی کشمیر کے دن آرمی چیف کی طرف سے اس طرح کا بیان دراصل ہر پاکستانی اور آزاد کشمیر کے شہری کی دل کی آواز ہے۔
تنویر الیاس نے کہا کہ پاک فوج کے سربراہ جنرل سید عاصم منیر نے جس انداز میں اہل کشمیر کے ساتھ یکجہتی کا اظہار کیا اسے کشمیری ہمیشہ یاد رکھیں گے، امید کرتے ہیں پاک فوج اور دیگر ادارے بھی کشمیریوں کے حق خود ارادیت کی آئندہ بھی اسی طرح حمایت جاری رکھیں گے، آزاد کشمیر کے لوگ پاکستان کا پہلے سے حصہ بن چکے ہیں۔
سابق وزیراعظم کا کہنا ہے کہ آزاد کشمیر میں سیاحت کے فروغ کے حوالے سے پاک فوج کے سربراہ جنرل سید عاصم منیر کے خیالات سن کر خوشی ہوئی ہے، جدوجہد آزادی اور تکمیل پاکستان کی جنگ ہم سب کی جنگ ہے، آزاد کشمیر اور پاکستان کی شہادتیں مشترکہ ہیں، 740 کلو میٹر طویل لائن آف کنٹرول پر پاک فوج کے سپاہیوں اور افسران کی موجودگی سے آزاد کشمیر میں آزادی، امن، سکون اور خوشحالی ہے۔
