راولپنڈی، مالدیپ کی مسلح افواج کے چیف آف ڈیفنس فورسز میجر جنرل ابراہیم ہلمی کی جانب سے جنرل ہیڈ کوارٹرز راولپنڈی کا دورہ کیا گیا۔
آئی ایس پی آر کا بتانا ہے کہ اپنے دورے کے دوران میجر جنرل ابراہیم ہلمی اور آرمی چیف جنرل سید عاصم منیر سے ملاقات کی ہے۔
ترجمان پاک فوج نے کہا کہ ملاقات کے دوران دوطرفہ دفاعی تعاون اور علاقائی سلامتی کی صورتحال پر تبادلہ خیال کیا گیا، ملاقات میں باہمی دلچسپی کے امور پر بھی تفصیلی بات کی گئی۔
آئی ایس پی آر کا بتانا ہے کہ آرمی چیف عاصم منیر اور میجر جنرل ابراہیم ہلمی نے دونوں اطراف سے پاکستان اور مالدیپ کے درمیان بھائی چارے اور دوستی کے پائیدار بندھنوں پر اطمینان کا اظہار کیا جبکہ دونوں نے اہم علاقائی امور پر اپنے مشترکہ نقطہ نظر پر زور دیا اور باہمی تعاون کو مزید وسعت دینے کا اعادہ کیا۔
ترجمان پاک فوج کے مطابق مالدیپ کے چیف آف ڈیفنس فورسز نے پاک فوج کی پیشہ ورانہ مہارتوں اور لگن کو سراہا۔
اس سے قبل آئی ایس پی آر کے مطابق ہنگری کے نائب وزیردفاع تھامس ورگھا نے جوائنٹ سٹاف ہیڈ کوارٹرز راولپنڈی کا دورہ کیا ہے اور چیئرمین جوائنٹ چیفس آف سٹاف کمیٹی جنرل ساحر شمشاد مرزا سے ملاقات کی ہے۔
ملاقات کے دوران دونوں رہنماؤں نے علاقائی صورت حال پر تبادلہ خیال کیا اور دفاع و سلامتی کے مختلف شعبوں میں دونوں ممالک کے درمیان باہمی تعاون کے نئے مواقع تلاش کرنے کی اہمیت پر زوردیا، جبکہ دہشت گردی کے خلاف جنگ میں پاک فوج قربانیوں کا اعتراف کیا ہے۔
