اسلام آباد، وفاقی وزیر داخلہ محسن نقوی کا کہنا ہے کہ خیبرپختونخوا پولیس کے بہادر سپوتوں نے اپنے خون سے وطن عزیز کے امن کی آبیاری کی ہے۔
وفاقی وزیر داخلہ محسن نقوی کی جانب سے کرک میں پولیس چوکی بہادر خیل پر فتنہ الخوارج کے دہشتگردوں کی فائرنگ کے واقعہ کی مذمت کی گئی اور فائرنگ سے شہید ہونے والے پولیس اہلکاروں کو خراج عقیدت پیش کیا گیا۔
وزیر داخلہ نے شہید پولیس اہلکاروں کے لواحقین سے دلی ہمدردی و تعزیت کا اظہار کیا اور واقعہ میں زخمی ہونے والے پولیس اہلکاروں کی جلد صحتیابی کیلئے دعا کی۔
وزیر داخلہ محسن نقوی کا کہنا ہے کہ فتنہ الخوارج کے دہشتگردوں نے رات کی تاریکی میں پولیس چوکی پر بزدلانہ حملہ کیا۔
خیبرپختونخوا پولیس کے شہید ہونے والے اہلکاروں کی قربانی کو سلام پیش کرتے ہیں، خیبرپختونخوا پولیس دہشتگردی کے خلاف جنگ میں فرنٹ لائن پر موجود ہے۔
محسن نقوی نے پختونخوا پولیس کے بہادر سپوتوں نے خون سے وطن عزیز کے امن کی آبیاری کی ہے، خیبرپختونخوا پولیس کی لازوال قربانیوں کو قدر کی نگاہ سے دیکھتے ہیں۔
واضح رہے کہ گزشتہ شب کرک میں پولیس چوکی پر دہشتگردوں نے فائرنگ کر دی جس میں 2 اہلکار شہید ہوگئے، شہداء میں عدنان اور نقیب شامل ہیں، واقعہ میں 6 پولیس اہلکار زخمی بھی ہوئے۔
