امریکی صدر ڈونلڈ ٹرمپ نے غزہ پر قبضہ کرنے کا اعلان کر دیا۔
امریکی صدر ڈونلڈ ٹرمپ نے غزہ کی پٹی پر طویل مدتی قبضے کا اعلان کیا ہے۔ انہوں نے اسرائیلی وزیرِ اعظم نیتن یاہو کے ساتھ وائٹ ہاؤس میں مشترکہ پریس کانفرنس کے دوران کہا کہ امریکہ غزہ کی پٹی کو اپنے کنٹرول میں لے گا اور اس کا مقصد اس علاقے میں استحکام لانا اور ہزاروں ملازمتوں کا پیدا کرنا ہوگا۔
ٹرمپ نے مزید کہا کہ وہ غزہ میں طویل المدتی ملکیت کے لیے منصوبہ رکھتے ہیں، اور وہاں کے لوگوں کے لیے ترقی کے مواقع پیدا کریں گے۔ ان کا کہنا تھا کہ فلسطینیوں کے لیے اردن اور مصر کے رہنماؤں کے ساتھ بات چیت کی جائے گی، جنہوں نے فلسطینیوں کو غزہ سے منتقل کرنے کے خیال کو پسند کیا ہے۔
انہوں نے یہ بھی کہا کہ اپنے منصوبے کے بعد وہ غزہ میں دنیا بھر سے لوگوں کو آباد ہوتے دیکھنا چاہتے ہیں۔ امریکی صدر نے سعودی عرب کے بارے میں بھی بات کی اور کہا کہ سعودی عرب اس منصوبے میں بہت مددگار ثابت ہوگا، اور ان کی توقع ہے کہ جنگ بندی قائم رہے گی۔ ٹرمپ نے اسرائیل، غزہ اور سعودی عرب کے دورے کا بھی ذکر کیا۔
اس دوران، اسرائیلی وزیرِ اعظم نیتن یاہو نے کہا کہ ٹرمپ کا منصوبہ فلسطینی علاقے غزہ پٹی کے کنٹرول کو امریکہ کے ہاتھ میں دینے کا ہے اور یہ منصوبہ تاریخ کو بدل سکتا ہے۔ نیتن یاہو نے یہ بھی کہا کہ ان کا مقصد ایران کو ایٹمی ہتھیار بنانے سے روکنا ہے۔
