کراچی، سندھ حکومت کی جانب سے منافع خوروں کے لئے الگ نئے تھانوں کے قیام کا فیصلہ کرلیا گیا۔
وزیراعلیٰ سندھ کے معاون خصوصی وقار مہدی کی زیر صدارت اشیائے ضروریہ کی قیمتوں پر ضابطے کے حوالے سے اعلیٰ سطح کا اجلاس ہوا، جس میں منافع خوروں کیخلاف سخت کارروائی کے لیے الگ تھانوں کے قیام کا فیصلہ کیا گیا۔
تھانوں کا دائرہ اختیار پورے سندھ میں ہوگا اور یہ تھانے منافع خوروں کیخلاف کارروائی کرنے کے مجاز ہوں گے، نئے قائم کردہ تھانوں میں محکمہ بیورو آف سپلائی اور پولیس کا عملہ شامل ہوگا۔
معاون خصوصی وقار مہدی کا کہنا ہے کہ سندھ بھر کی سبزی منڈیوں کے کولڈ سٹوریج رجسٹرڈ کیے جائیں گے اور ان کی نگرانی کی جائے گی تاکہ وہ زیادہ قیمت پر اشیاء نہ بیچیں، فیصلے کا مقصد اشیائے ضروریہ کی قیمتوں میں استحکام لانا اور ذخیرہ اندوزی و گراں فروشوں کو روکنا ہے۔
وقار مہدی کا کہنا ہے کہ تمام گڈاؤنز کو رمضان سے پہلے رجسٹرڈ کرنے کا فیصلہ کیا ہے، بچت بازاروں میں اشیائے ضروریہ کے خصوصی سٹالز اور پھلوں کی مقرر کردہ قیمتوں پر فروخت کو یقینی بنانے کے لئے اقدامات کیے جائیں۔
اجلاس میں روشنیوں کے شہر کراچی کی بچت بازاروں میں سستے نرخوں پر مصالحہ جات کے سٹالز لگانے کا بھی فیصلہ کیا گیا، سندھ بھر کی مارکیٹس کی نگرانی کے لئے خصوصی ڈیوٹیز لگائی جائیں، معاون خصوصی نے سرکاری پرائس لسٹ تمام دکانداروں اور ٹھیلے والوں کو آویزاں کرنے کی ہدایت کی۔