پاکستان تحریک انصاف (پی ٹی آئی) نے 8 فروری کے جلسے کی اجازت کے لیے لاہور ہائی کورٹ سے رجوع کرلیا۔
پاکستان تحریک انصاف (پی ٹی آئی) نے 8 فروری کو مینارِ پاکستان پر جلسے کی اجازت کے حصول کے لیے لاہور ہائیکورٹ میں درخواست دائر کر دی ہے۔
چیف آرگنائزر پی ٹی آئی پنجاب عالیہ حمزہ کی جانب سے دائر کردہ درخواست میں مؤقف اختیار کیا گیا ہے کہ جلسے کی اجازت کے لیے 29 جنوری کو ڈپٹی کمشنر (ڈی سی) لاہور کو درخواست دی گئی، مگر تاحال کوئی جواب موصول نہیں ہوا۔
درخواست میں یہ بھی کہا گیا کہ پی ٹی آئی جب بھی جلسے کی اجازت طلب کرتی ہے تو امن و امان کا بہانہ بنایا جاتا ہے۔ عدالت سے استدعا کی گئی ہے کہ ڈپٹی کمشنر لاہور سمیت دیگر متعلقہ حکام کو مینارِ پاکستان پر جلسے کی اجازت دینے کی ہدایت جاری کی جائے۔
واضح رہے کہ پاکستان تحریک انصاف نے 8 فروری کو یومِ سیاہ منانے کا اعلان کر رکھا ہے، جبکہ وفاقی وزیر داخلہ محسن نقوی نے پی ٹی آئی سے درخواست کی ہے کہ وہ اس دن جلسہ منعقد نہ کرے۔