لاہور، پاکستان مسلم لیگ ن کے مرکزی رہنما اور مشیر وزیراعظم برائے سیاسی امور رانا ثناء اللہ کی جانب سے پی ٹی آئی کو مذاکرات کیلئے ڈیڈ لائن دے دی گئی۔
رانا ثناء اللہ نے نجی ٹی وی سے گفتگو کے دوران کہا کہ پی ٹی آئی والے آج رات 12 بجے تک آجائیں، وزیراعظم پاکستان نے مذاکرات کی آفر کی ہے، ملک کی بہتری کیلئے بات کرنے کے لیے تیار ہیں۔
مشیر وزیراعظم پاکستان نے کہا کہ جب ہم اپوزیشن میں تھے تب شہباز شریف نے بانی پی ٹی آئی عمران خان کو کہا تھا بیٹھیں بات کریں، 2018 کے بعد ہمیں گلہ تھا رزلٹ الٹ دیا گیا انہوں نے حکومت بنائی، تحریک انصاف کے انتظار کی بات نہیں، ڈائیلاگ کرنا بنیادی شرط ہے۔
مشیر وزیراعظم کا کہنا ہے کہ پی ٹی آئی والے 4 سال کی حکومت میں مقدمات بناتے تھے، ہم ان سے بات کرتے تھے، ہمارا گزارا علی امین گنڈاپور صاحب کے ساتھ ٹھیک چل رہا ہے، وزیراعلیٰ خیبرپختونخوا علی امین گنڈاپور کی جگہ کوئی اور آئے گا تو اس کے ساتھ بھی ٹھیک ہی چلے گا۔
ن لیگی رہنما نے کہا کہ انہوں نے پچھلے 1 سال میں کبھی جلسہ، کبھی سڑک پر ریلی کر لی، وفاقی دارالحکومت اسلام آباد پر چڑھائی کا نقصان ان کو خود انتظامی اور سیاسی طور پر ہوا، خیبرپختونخوا کی اکانومی اور امن وامان کا ستیاناس کر دیا۔
رانا ثناء اللہ نے کہا کہ انہیں گورننس یا لوگوں کی بھلائی سے کوئی سروکار نہیں، کوئی اور آئے گا تو وہ بھی یہی کرے گا جو علی امین گنڈاپور صاحب کر رہے ہیں، ان چیزوں سے پی ٹی آئی کو ناقابل تلافی نقصان ہو گا۔