ڈپٹی کمشنر صفدر حسین ورک نے کھیلتا پنجاب تین روزہ اسپورٹس ایرینا ایونٹ کا افتتاح کیا۔
گجرات: وزیراعلیٰ پنجاب مریم نواز شریف اور وزیر صنعت و تجارت چوہدری شافع حسین کی ہدایات پر گجرات میں کھیلتا پنجاب پروگرام کے تحت تین روزہ کھیلوں کے مقابلوں کا آغاز کیا گیا۔ اسپورٹس ایرینا گجرات میں منعقدہ اس ایونٹ کی افتتاحی تقریب ریلوے پھاٹک سرگودھا روڈ پر منعقد ہوئی، جس کا افتتاح ڈپٹی کمشنر گجرات صفدر حسین ورک نے کیا۔
ڈپٹی کمشنر صفدر حسین ورک نے افتتاحی تقریب سے خطاب کرتے ہوئے کہا کہ حکومت پنجاب نوجوانوں کو صحت مند سرگرمیوں کی جانب راغب کرنے کے لیے کھیلوں کے فروغ پر بھرپور توجہ دے رہی ہے۔ انہوں نے اس بات پر زور دیا کہ ایسے ایونٹس نوجوانوں کی جسمانی اور ذہنی صحت کے ساتھ ساتھ معاشرتی ترقی میں بھی مددگار ثابت ہوتے ہیں۔
ایونٹ میں کرکٹ، فٹبال، بیڈمنٹن سمیت مختلف کھیلوں کے مقابلے منعقد کیے جا رہے ہیں، جن کا مقصد نوجوانوں کی صلاحیتوں کو اجاگر کرنا اور انہیں مثبت سرگرمیوں میں مصروف رکھنا ہے۔ افتتاحی تقریب میں چیف آفیسر میونسپل کارپوریشن گجرات خالق داد، سینئر صحافی ڈاکٹر عرفان مغل، سید اظہر حسین شاہ، اور سید عاصم رضا سمیت شہریوں کی بڑی تعداد نے شرکت کی۔
ڈپٹی کمشنر نے کھلاڑیوں سے ملاقات کی اور ضلعی انتظامیہ کی جانب سے کھیلوں کے فروغ کے لیے بھرپور تعاون کی یقین دہانی کرائی۔ انہوں نے کہا کہ گجرات میں کھیلوں کے فروغ کے لیے تمام وسائل بروئے کار لائے جا رہے ہیں اور مستقبل میں بھی ایسے اقدامات جاری رکھے جائیں گے۔
