لاہور، گورنر پنجاب سردار سلیم حیدر کا کہنا ہے کہ پیپلزپارٹی پیکا ایکٹ کیخلاف ہر فورم پر آواز اٹھائے گی۔
گورنر پنجاب سردار سلیم حیدر خان سے پیپلز پارٹی کے سینئر رہنماؤں کی جانب سے ملاقات کی گئی، جس میں پیکا ایکٹ پر تشویش کا اظہار کیا گیا۔
اس موقع پر گفتگو کے دوران گورنر پنجاب سردار سلیم حیدرخان نے کہا کہ پیپلز پارٹی نے ہمیشہ جمہوریت اور آزادی صحافت کیلئے قربانیاں دیں، پیپلز پارٹی کسی بھی ایسے بل کا حصہ نہیں بنے گی جو آزادی صحافت میں رکاوٹ بنے، پیپلز پارٹی ایسے تمام اقدامات کی مخالفت کرے گی جس سے صحافی برادری کو نقصان پہنچے۔
سردار سلیم حیدر نے کہا کہ بلاول بھٹو زرداری جلد لاہور کا دورہ کریں گے، پارٹی ورکرز اور رہنماؤں سے ملاقات کریں گے، پیپلز پارٹی پنجاب میں اپنا کھویا ہوا مقام اور سیاسی طاقت واپس حاصل کرے گی، ن لیگ اقتدار میں آنے کے بعد پیپلز پارٹی کو نظر انداز نہ کرے۔
گورنر پنجاب کا کہنا تھا کہ ن لیگ کو پیپلز پارٹی کے ساتھ کئے گئے معاہدوں پر عملدرآمد کرنا چاہیے، پنجاب میں پیپلز پارٹی کے ورکرز سمیت کسی سے زیادتی برداشت نہیں کروں گا، پیپلزپارٹی پنجاب سمیت پورے پاکستان میں تیزی سے مقبول ہورہی ہے، پاکستان کے اگلے وزیراعظم بلاول بھٹو زرداری ہوں گے۔
دوسری جانب وزیراعلیٰ پنجاب مریم نواز کی جانب سے آئندہ ماہ صوبہ بھر میں 20 ہزار گھروں کی تعمیر کا ہدف دے دیاگیا۔