وزیر اعلیٰ خیبر پختونخوا علی امین گنڈاپور نے وفاقی حکومت سے متنازعہ کمیٹی کو نوٹیفکیشن واپس لینے کا مطالبہ کر دیا۔
پشاور: وزیر اعلیٰ خیبر پختونخوا علی امین گنڈاپور نے وفاقی حکومت کی جانب سے ضم شدہ اضلاع کے فنڈز سے متعلق قائم کی گئی کمیٹی پر تحفظات کا اظہار کرتے ہوئے نوٹیفکیشن واپس لینے کا مطالبہ کیا ہے۔ وزیر اعظم شہباز شریف کو لکھے گئے خط میں انہوں نے واضح کیا کہ 25ویں آئینی ترمیم کے تحت فاٹا خیبر پختونخوا میں ضم ہوا اور آئین کے مطابق ان اضلاع کے تمام انتظامی اختیارات صوبائی حکومت کے پاس ہیں۔
علی امین گنڈاپور نے کہا کہ وفاقی حکومت کی جانب سے کمیٹی کا قیام آئین کی خلاف ورزی اور صوبائی حکومت کے اختیارات کو نظرانداز کرنے کے مترادف ہے۔ انہوں نے متنازعہ کمیٹی کے نوٹیفکیشن کو فوری طور پر واپس لینے کا مطالبہ کیا اور خبردار کیا کہ اگر ایسا نہ ہوا تو خیبر پختونخوا حکومت اپنے آئینی حقوق کے تحفظ کے لیے اعلیٰ عدلیہ سے رجوع کرنے کا حق محفوظ رکھتی ہے۔