لاہور، محکمہ داخلہ پنجاب کی جانب سے صوبے میں پتنگ اڑانے پر مکمل پابندی عائد کردی گئی۔
ترجمان محکمہ داخلہ کے مطابق صوبے میں پتنگ اڑانے پر مکمل پابندی عائد ہے اور خلاف ورزی پر سخت سزائیں ہوں گی۔
ترجمان کا کہنا ہے کہ صوبہ پنجاب میں پتنگ اڑانا ناقابل ضمانت جرم قرار دیدیا گیا ہے، خلاف ورزی کرنیوالوں پر 3 سے7 سال تک قید کی سزا ہوگی جبکہ پتنگ کی تیاری اور فروخت پر 5 لاکھ سے 50 لاکھ تک جرمانہ ہوگا۔
ترجمان کا بتانا ہے کہ پابندی کا اطلاق پتنگوں، دھاتی تاروں، نائلون کی ڈوری، تیزدھار مانجھے سمیت تمام دھاگوں پر ہوگا، جبکہ پتنگ اڑانے والے کو 3 سے 5 سال قید یا 20 لاکھ جرمانہ یا دونوں ہوں گے۔
ترجمان کے مطابق پتنگ ساز اور ٹرانسپورٹرز کو 5 سے 7 سال قید یا 50 لاکھ جرمانہ یا دونوں ہوں گے، اس کے علاوہ پتنگ اڑانے میں ملوث بچے کو پہلی بار 50 ہزار جرمانہ اور دوسری بار ایک لاکھ جرمانہ ہوگا۔
محکمہ داخلہ پنجاب کا بتانا ہے کہ پنجاب اسمبلی نے پتنگ اڑانے کی ممانعت کا ترمیمی ایکٹ 2024 منظور کیا تھا۔
