پاکستان کی معروف اور سینئر اداکارہ صبا فیصل نے گھر میں لڑائی اور جھگڑے کی وجہ گھریلو ملازماؤں کو قرار دے دیا۔
حال ہی میں سینئر اداکارہ صبا فیصل، احمد علی بٹ کے پوڈ کاسٹ میں مہمان بنیں، جہاں صبا فیصل نے گفتگو کرتے ہوئے کہا کہ گھروں میں جو فساد ہوتے ہیں ان کی سب سے بڑی وجہ گھر میں کام کرنے والی ملازمہ ہوتی ہے، ان سے بڑا فساد ہماری گھریلو زندگی میں کوئی نہیں ہے۔
صبا فیصل نے اپنی بات کی وضاحت پیش کرتے ہوئے کہا کہ کام والیاں یہ کرتی ہیں کہ کسی کی بات دوسرے کو کہہ دیتی ہیں اور دوسرا شخص یقین بھی کرلیتا ہے، یعنی ادھر کی بات ادھر کرتی ہیں جس کی وجہ سے لڑائیاں جنم لیتی ہیں۔
اداکارہ نے کہا کہ میں نے اپنے گھر میں اصول بنایا کہ کام والی کسی سے بھی کوئی بات نہیں کرے گی اور 2 ملازمائیں بیٹھ کر آپس میں بات چیت نہیں کریں گی، اگر کوئی ملازمہ مجھ سے ہمدردی میں آکر کچھ کہتی بھی ہے یا دوسرے کی برائی کرتی ہے تو میں فوراً ڈانٹ پلا دیتی ہوں کہ خاموش ہوجاؤ بالکل اور اپنا کام کرو۔
معروف اداکارہ کا کہنا ہے کہ میرے لیے میرے سارے بچے اور بہوئیں برابر ہیں، خبردار اگر کسی کے بارے میں کوئی بھی بات کی تو، ان لوگوں کی باتیں سن کر ہم انہیں بڑھاوا دے رہے ہوتے ہیں، گھروں کی تباہی کے ذمہ دار یہی لوگ ہیں۔
واضح رہے کہ گزشتہ سالوں میں صبا فیصل کے اپنی بہو اور بیٹے سے اختلافات کی خبریں سامنے آئی تھیں جس کی تصدیق ان کی بہو سمیت انہوں نے خود بھی کی تھی تاہم بعدازاں دونوں میں صلح ہوگئی تھی۔