منشیات اسمگلنگ ثابت ہونے پر مجرم کو عمر قید کی سزا سنا دی گئی۔
پشاور، منشیات اسمگلنگ ثابت ہونے پر عدالت کی جانب سے مجرم کو عمر قید اور 10 لاکھ روپے جرمانے کی سزا سنادی گئی۔
ایڈیشنل سیشن جج عطا اللہ جان کی جانب سے کروڑوں روپے مالیت کی منشیات اسمگل کرنے کے الزام میں گرفتار ملزم کو جرم ثابت ہونے پر عمر قید اور 10 لاکھ روپے جرمانے کی سزا سنادی گئی۔
مقدمے کی سماعت کے دوران استغاثہ کی جانب سے پیروی اسسٹنٹ پبلک پراسیکیوٹر ڈینس مراد نے کی۔
واضح رہے کہ زیر حراست ملزم محمد صابر کو ایکسائز پولیس نے موٹروے ناکا بندی پر کیری ڈبہ میں 48 کلو چرس اسمگل کرنے کی کوشش ناکام بناتے ہوئے گرفتار کرکے 5 فروری 2024 کو انسداد منشیات ایکٹ کے تحت مقدمہ درج کیا۔
اسکے بعد تفتیش مکمل ہونے پر ایکسائز پولیس کی جانب سے مکمل چالان عدالت میں جمع کرایا گیا، جہاں عدالت نے تمام گواہوں اور ثبوتوں کی بنا پر ملزم پر جرم ثابت ہونے پر عمر قید اور 10 لاکھ روپے جرمانے کی سزا سنادی۔
جرمانے کی عدم ادائیگی کی صورت میں ملزم کو مزید 5 ماہ جیل میں گزارہونا ہوگی۔