لاہور، وفاقی وزیر اطلاعات عطا تارڑ کا کہنا ہے کہ پی ٹی آئی کا سیاست کیلئے مذہب کارڈ کا استعمال افسوسناک ہے۔
لاہور میں علما کرام کے ہمراہ پریس کانفرنس کے دوران وفاقی وزیر اطلاعات عطا تارڑ کا کہنا تھا کہ 190 ملین پاؤنڈ اوپن اینڈ شٹ کیس تھا، عدالتی فیصلہ ملکی تاریخ کا اہم ترین فیصلہ ہے، تحریک انصاف کے دور میں شہزاد اکبر نے ایسٹ ریکوری یونٹ بنایا۔
عطا تارڑ نے کہا کہ پی ٹی آئی اپنی چوری چھپانے کیلئے مذہب کارڈ استعمال کررہی ہے، جب اس کیس میں قانونی دفاع نہ ہوا تو مذہب کارڈ استعمال کرنے لگے، تحریک انصاف والے خدا کا خوف کریں یہ اس معاملے پر مذہب کو نہ لیکر آئیں، سیاست کیلئے مذہب کارڈ کا استعمال افسوسناک ہے۔
وفاقی وزیر اطلاعات نے کہا کہ مجھے بتا دیں القادر یونیورسٹی میں کون سی مذہبی تعلیم دی جارہی ہے، کابینہ نے بند لفافہ منظور کرکے اس کے حوالے کیا جس نے چوری کی، 190 ملین پاؤنڈ تاریخ کا سب سے بڑا ڈاکہ ہے، بانی پی ٹی آئی کو رشوت اور ڈاکے کی سزا ملی۔
عطا تارڑ کا کہنا ہے کہ این سی اے نے پیسہ ضبط کرکے حکومت کے حوالے کیا ہے، یہ پیسہ پاکستان کے عوام کی فلاح و بہبود کیلئے تھا، وزیراعظم نے این سی اے کی تحقیقات میں خود کو کلیئر کیا۔
سینئر ن لیگی رہنما کا کہنا تھا کہ یہ وہی پیسہ ہے جس سے 25 کروڑ کا گھر بنایا گیا، بتایا جائے، عمران خان کے ذرائع آمدن کیا ہیں؟ پی ٹی آئی کے پاس اپیل کیلئے مضبوط مواد نہیں ہے، القادر ٹرسٹ کو حکومتی تحویل میں دے دیا گیا ہے۔