لاہور، سابق وفاقی وزیر فواد چودھری کا کہنا ہے کہ پی ٹی آئی کو تسلیم نہ کرنے تک ملک افراتفری کا شکار رہے گا۔
لاہور میں انسداد دہشت گردی عدالت پیشی کے موقع پر میڈیا سے گفتگو کے دوران فواد چودھری کا کہنا تھا کہ بہت کچھ بہتر ہوا ہے، سب لوگ بتا رہے ہیں لوکل ماحول بہتر ہوا ہے، پی ٹی آئی کو مذاکرات کا حصہ بننا چاہئے، اسٹیبلشمنٹ، حکومت اور اپوزیشن میں سے لوگ پاکستان کے لئے سامنے آئیں۔
فواد چوہدری نے کہا کہ مذاکرات انتہائی مثبت عمل ہے، سیاست کرنے کا ایک ماحول ملنا چاہیے، جب تک پی ٹی آئی کو تسلیم نہیں کیا جاتا تب تک ملک میں افراتفری رہے گی، ہر جماعت میں شدت پسند لوگ ہیں، خواجہ آصف کو شامل نہیں کیا اس لئے وہ غصہ ہیں۔
فواد چودھری نے کہا کہ اگر بانی پی ٹی آئی عمران خان کی زندگی کو خطرہ ہے تو فوری طور پر ان کو جیل سے نکالنے کیلئے اقدامات کیے جائیں۔
انسداد دہشت گردی عدالت میں فواد چودھری کی 5 مقدمات میں درخواست ضمانت پر جج منظر علی گل کی جانب سے سماعت کی گئی۔
سماعت کے دوران پولیس کی جانب سے عدالت کو آگاہ کیا گیا کہ تمام مقدمات میں تفتیش مکمل ہے، فواد چودھری کے وکیل ایڈووکیٹ نجیب فیصل کا کہنا ہے کہ پولیس نے اپنے دفتر بلوایا ہے، دفتر جا کر الزامات کی تفصیلات دیکھ لیں گے۔
اسکے بعد عدالت کی جانب سے سابق وفاقی وزیر فواد چودھری کی 5 مقدمات میں عبوری ضمانت میں 12 فروری تک توسیع کردی گئی۔
