لاہور، وزیراطلاعات پنجاب عظمیٰ بخاری کا کہنا ہے کہ کوئی بھی شعور رکھنے والا انسان سابق وزیراعظم عمران خان کو سپورٹ نہیں کر سکتا۔
لاہور میں پریس کانفرنس کے دوران صوبائی وزیراطلاعات عظمی ٰبخاری نے کہا کہ ایک فتنہ اڈیالہ جیل میں موجود ہے، فتنے نے سول نافرمانی کی کال دی تھی، فائنل کال دی گئی جو مسڈ کال ثابت ہوئی، یہ لوگ پاکستان کے دوست ممالک سے رابطہ کرتے ہیں۔
عظمیٰ بخاری نے کہا کہ وقاص اکرم کہہ رہے تھے سول نافرمانی کا اثر 2 ماہ بعد ہو گا، اوورسیز پاکستانی بھی اس شخص کو جان چکے ہیں، کوئی بھی شعور رکھنے والا اس شخص کو سپورٹ نہیں کر سکتا، یہ جب اقتدار میں تھے تو بار بار کہتے تھے این آر او نہیں دوں گا، آج گھٹنوں پر بیٹھ کر این آر او مانگا جا رہا ہے، بانی پی ٹی آئی نے کہا مجھ سے ملنے کی ضرورت بھی نہیں جا کر مجھے رہا کروائیں۔
صوبائی وزیر نے کہا کہ یہ وہ شخص ہے جو اے سی اور کھانا بند کرواتا تھا، اب تو عمران خان کو ان کے گھر والے ملنے نہیں جاتے، پاکستان کو تباہی کا شکار کرنے والے ناکام ہو گئے ہیں، فتنہ گروپ کا مقصد اداروں کیخلاف ہرزہ سرائی تھی۔
عظمیٰ بخاری کا کہنا ہے کہ 2 ارب روپے 26 نومبر کے فساد سے پہلے تقسیم کئے گئے، باتیں نکل رہی ہیں کہ علی امین گنڈاپور اور ان کی کابینہ کرپشن میں ملوث ہے، خیبرپختونخوا میں کرپشن ہو رہی ہے، امین گنڈاپور کے اپنے وزیر کرپشن پر سوال اٹھا رہے ہیں، کے پی کی عوام کے ساتھ ایسا نہیں ہونا چاہئے تھا۔
ن لیگی رہنما کا کہنا ہے کہ اس سال ترسیلات زر میں بھی اضافہ ہوا ہے، ہر روز ایک نئے پراجیکٹ پر کام ہو رہا ہوتا ہے، مریم نواز نے مختلف پراجیکٹس کا آغاز کیا ہے، پہلے پروگرام لانچ کئے جاتے تھے پر مکمل نہیں ہوتے تھے، وزیراعلی ٰ مریم نواز سکالر شپس کا بولتی نہیں جا کر ہاتھوں میں دیتی ہیں، انہوں نے ہونہار سکالرشپ کے 3 سے 4 ایونٹ میں شرکت کی۔
