اسلام آباد، لیفٹیننٹ جنرل نگار جوہر کا کہنا ہے کہ ہمیں لڑکیوں کی تعلیم کے لیے معاشرتی رویوں کو چیلنج کرنا ہوگا۔
مسلم معاشروں میں لڑکیوں کی تعلیم کے موضوع پر 2 روزہ بین الاقوامی کانفرنس سے خطاب کے دوران پاک فوج کی پہلی خاتون لیفٹیننٹ جنرل نگار جوہر کا کہنا ہے کہ تعلیم کا موضوع میرے دل کے قریب ہے، پڑھی لکھی خواتین معاشرے میں ترقی کی ضامن ہیں۔ خواتین کو با اختیار بنانا وقت کی ضرورت ہے۔
لیفٹیننٹ جنرل نے کہا کہ خواتین کی تعلیم سے متعلق چیلنجز ضرور ہیں مگر موجود مواقع سے فائدہ اٹھانا چاہیے، نیشنل پالیسی اور بجٹ میں خواتین کی تعلیم سے متعلق اقدامات کیے جانے چاہیے، خواتین کی تعلیم کے حوالے سے معاشرے میں آگاہی مہم چلانے کی ضرورت ہے کیوں کہ آج کی پڑھی لکھی خاتون معاشرے میں کردار ادا کرے گی۔
لیفٹیننٹ جنرل نگار جوہر کا کہنا تھا کہ میں ایسے معاشرے میں پلی بڑھی جہاں صنفی تفریق عام تھی۔ لڑکیوں کی تعلیم کو اکثر نظرانداز کیا جاتا تھا، تعلیم نے میری زندگی میں انقلاب برپا کیا اور آج اس مقام پر ہوں جہاں ملک کی خدمت کر رہی ہوں۔
جنرل نگار نے کہا کہ بطور فوجی، ایسے علاقے بھی دیکھے جہاں گرلز اسکول تباہ ہوچکے تھے اور لڑکیوں کو زبردستی تعلیم سے محروم کر دیا گیا تھا، ان بہادر لڑکیوں کو بھی دیکھا جو اپنی تعلیم کے حق کے لیے کھڑی ہوئیں اور جدوجہد کی۔
تقریب سے خطاب کرتے ہوئے لیفٹیننٹ جنرل نے کہا کہ ہمیں لڑکیوں کی تعلیم کے لیے معاشرتی رویوں کو چیلنج کرنا ہوگا۔ فیصلہ سازی و پالیسی سازی میں لڑکیوں کی شمولیت کو یقینی بنانا ہوگا۔
