مایہ ناز بنگلہ دیشی کرکٹر اور سابق کپتان تمیم اقبال کی جانب سے انٹرنیشنل کرکٹ سے ریٹائرمنٹ کا اعلان کر دیا گیا۔
تمیم اقبال نے دوسری بار انٹرنیشنل کرکٹ سے ریٹائرمنٹ کا اعلان کیا، اس سے پہلے جولائی 2023 میں انہوں نے ریٹائرمنٹ کا اعلان کرکے 24 گھنٹے بعد فیصلہ واپس لے لیا تھا۔
مایہ ناز کرکٹر تمیم اقبال نے جمعہ کو اپنی ریٹائرمنٹ کا اعلان سوشل میڈیا پر کیا۔
بائیں ہاتھ کے کرکٹر تمیم اقبال نے اپنے بیان میں کہا کہ کافی عرصے سے انٹرنیشنل کرکٹ سے دور رہا اور اب یہ میرے انٹرنیشنل کیریئر کا اختتام ہے، اس متعلق کافی عرصے سے سوچ رہا تھا۔
تمیم اقبال کا کہنا ہے کہ اب جب چیمپئنز ٹرافی جیسا بڑا ایونٹ قریب ہے تو میں اپنے آپ کو ڈسکس نہیں کروانا چاہتا، ایک لمبے عرصے سے بی سی بی کے سینٹرل کنٹریکٹ سے خود کو الگ کر لیا تھا، ریٹائرمنٹ یا کھیلنے کا فیصلہ کسی بھی ایتھلیٹ یا کرکٹر کا ذاتی ہوتا ہے۔
تمیم اقبال نے کہا کہ کپتان نظم الحسین شنتو نے مجھے واپسی سے متعلق نیک نیتی سے پوچھا، سلیکشن کمیٹی نے بھی میری سلیکشن کے حوالے سے مجھ سے پوچھا مگر میں نے فیصلہ کر لیا تھا، مجھے اتنا اہم سمجھنے پر ان تمام افراد کا شکریہ۔
تمیم اقبال نے اپنی ریٹائرمنٹ کے فیصلے سے متعلق بنگلا دیش کرکٹ بورڈ کے سلیکٹرز کو آگاہ کر دیا ہے۔
یاد رہے کہ تمیم اقبال نے 2007 میں ون ڈے، ٹی ٹوئنٹی اور 2008 میں ٹیسٹ ڈیبیو کیا تھا۔
مایہ ناز کرکٹر نے 70 ٹیسٹ میچز میں 5 ہزار 134، 243 ون ڈے میں 8 ہزار 357 اور 78 ٹی ٹوئنٹی انٹرنیشنلز میں ایک ہزار 758 رنز بنائے۔
