پشاور، پی ٹی آئی کے رہنما شوکت یوسفزئی کی جانب سے خبردار کیا گیا کہ حکومت اور پی ٹی آئی کے درمیان مذاکرات کا تیسرا دور شاید آخری ہو۔
نجی ٹی وی چینل سے گفتگو کے دوران شوکت یوسفزئی کا کہنا تھا شیر افضل مروت اور سلمان اکرم راجا کی میڈیا پر لڑائی دیکھ کر افسوس ہوا، سینیئر پارٹی قیادت پارٹی کے اندر ڈسپلن قائم کرے۔
حکومت کیساتھ مذاکرات سے متعلق شوکت یوسفزئی کا کہنا تھا حکومت اور پی ٹی آئی مذاکرات کا تیسرا دور شاید آخری ہو کیونکہ حکومت سنجیدہ نہیں ہے۔
شوکت یوسفزئی نے کہا کہ حکومت اب بیک فٹ پر جا رہی ہے، عمران خان پہلے ہی کہہ چکے کہ حکومت کے پاس اختیارات نہیں ییں، اختیار ہے تو بانی پی ٹی آئی سے مذاکراتی کمیٹی کی ملاقات کیوں نہیں کرائی جاتی۔
رہنما پی ٹی آئی نے کہا کہ اچھا ہوا کہ تحریک انصاف نے مذاکرات کر کے حکومت کو بے نقاب کر دیا، حکومت مذاکرات سے خوفزدہ لگ رہی ہے، اسٹیبلشمنٹ کو اب سمجھ آ جانی چاہیے کہ ن لیگ اور پیپلز پارٹی ملک پر بوجھ ہیں۔
شوکت یوسفزئی نے کہا کہ یہ اڑان پاکستان کی باتیں کر رہے ہیں لیکن پیسے کہاں ہیں، 2 سال میں 27 ہزار ارب روپے قرضہ لیا گیا، کیا اڑان پاکستان قرضوں سے چلے گا، وفاقی حکومت بتائے کہ 27 ہزار ارب روپے کہاں خرچ ہوئے، قوم کو حساب دے، ایک روپے کا ریلیف بھی عوام کو نہیں مل سکا۔
شوکت یوسفزئی کا کہنا تھا پنجاب میں ترقی کا جھوٹا دعویٰ کیا جا رہا ہے، لیپ ٹاپ تقسیم کرنے سے عوام کے دل نہیں جیتے جاتے۔
