اسلام آباد، وائی فائی اور وائرلیس نیٹ ورکس کے ذریعے حساس معلومات چوری ہونے کے خدشے پر وائرلیس راؤٹرز کو کم سے کم محفوظ ڈیوائسز قراد دے دیا گیا۔
وفاقی حکومت نے وائی فائی اور وائرلیس نیٹ ورکس کے ذریعے حساس معلومات چوری ہونے کے خدشے کے پیش نظر وائرلیس راؤٹرز کو کم محفوظ ڈیوائسز قرار دیا ہے۔ کابینہ ڈویژن نے اس حوالے سے تمام وفاقی وزارتوں، ڈویژنز، اور صوبائی حکومتوں کو ایک مراسلہ جاری کیا ہے۔
مراسلے میں کہا گیا ہے کہ وائی فائی نیٹ ورکس کے ذریعے نیٹ ورک ٹریفک میں مداخلت اور انٹرنیٹ ٹریفک کو غیر محفوظ سمت میں موڑنے کے امکانات موجود ہیں۔ مزید برآں، وائی فائی نیٹ ورکس پر ڈائریکٹریز اور فائلز آسانی سے شیئر کی جا سکتی ہیں، جو حساس معلومات کے چوری ہونے کا خطرہ بڑھا دیتی ہیں۔
صارفین کو مشورہ دیا گیا ہے کہ وائی فائی پاسورڈز پیچیدہ رکھیں، نیٹ ورک کا نام اور شناخت خفیہ رکھیں، اور اہم معلومات کی حفاظت کے لیے گیسٹ نیٹ ورکس کو بند کر دیں۔ ان اقدامات سے حساس معلومات کی حفاظت یقینی بنائی جا سکتی ہے اور غیر مجاز رسائی کے خطرات کم ہو سکتے ہیں۔
