لاہور، قومی کرکٹ ٹیم کے سابق کپتان اور مایہ ناز بلے باز بابراعظم ’سی اے‘ کا بیٹ استعمال کرنے کا کتنا معاوضہ وصول کریں گے؟ تفصیلات منظر عام پر آگئیں۔
غیر ملکی میڈیا کے مطابق قومی ٹیم کے مایہ ناز بیٹسمین بابر اعظم نے انگلینڈ کی کمپنی گرے نکولس کے ساتھ اپنی طویل شراکت ختم کر کے پاکستان میں کرکٹ کا سامان تیار کرنے والی کمپنی سی اے اسپورٹس کے ساتھ معاہدہ کرلیا ہے۔
ذرائع کی جانب سے انکشاف کیا گیا کہ سابق کپتان نے پاکستانی برانڈ کے ساتھ ایک منافع بخش ڈیل کی ہے جس میں کئی مراعات شامل ہیں۔
سی اے اسپورٹس نہ صرف کرکٹر کو بیٹ اسپانسر فیس کے سالانہ 7 کروڑ روپے ادا کرے گا بلکہ انہیں اچھی پرفارمنس پر الگ سے بونس بھی دے گا۔
غیر ملکی میڈیا نے یہ بتایا کہ بابراعظم کو ہر ففٹی اور سنچری پر الگ سے اضافی رقم ملے گی جس سے ان کی کارکردگی کی حوصلہ افزائی ہوگی۔
یاد رہے کہ 7 کروڑ روپے سالانہ پاکستان کرکٹ کی تاریخ میں کسی بھی بلے باز کا سب سے منافع بخش معاہدہ ہے جو ویرات کوہلی اور جو روٹ جیسے عالمی کرکٹ سپر اسٹارز کے اسی طرح کے معاہدوں کا مقابلہ کرتا ہے۔
واضح رہے کہ مایہ ناز بیٹسمن بابر اعظم ایک بہترین بلے باز کے طور پر جانے جاتے ہیں، جنہوں نے اکثر میچز میں قومی ٹیم کو بڑی مشکلات سے نکالا ہے۔
