پنجاب میں پاور شیئرنگ فارمولے پر عملدرآمد کرانے کیلئے صوبائی حکومت کو مجبور کرنے کا فیصلہ کرلیا گیا۔
راولپنڈی، باخبر ذرائع کے مطابق پاکستان پیپلز پارٹی کی جانب سے پنجاب میں پاور شیئرنگ فارمولے پر عملدرآمد کرانے کیلئے صوبائی حکومت کو سیاسی طور پر مجبور کرنے کا فیصلہ کرلیا گیا۔
ذرائع کا بتانا ہے کہ تخت لاہور میں حصہ داری کیلئے پیپلز پارٹی پنجاب نے ورکرز کو متحرک کرنے کیلئے رابطہ مہم شروع کردی ہے۔
ذرائع کے مطابق پہلے مرحلے میں ضلعی سطح پر پارٹی کو مضبوط کرنے کیلئے ورکرز کنونشن کرکے کارکنوں کو متحرک کیا جائے گا، اس دوران صوبائی حکومت کی پالیسیوں کا پوسٹ مارٹم کرکے کارکنوں میں جوش و خروش پیدا کیا جائے گا۔
ذرائع کے مطابق مرکز میں پاور شیئرنگ ایشوز پر دونوں پارٹیوں کی اعلیٰ قیادت میں رابطوں اور ساتھ چلنے پر اتفاق رائے کے باوجود شیخوپوہ ورکرز کنونشن میں صوبائی رہنماؤں کی تقاریر نے واضح کردیا کہ پاکستان پیپلز پارٹی وفاق اور پنجاب میں الگ الگ مؤقف اپنانے جا رہی ہے۔
دوسری جانب وزیر داخلہ محسن نقوی سے امریکی سفیر ڈونلڈ بلوم نے الوداعی ملاقات کی، ملاقات کے دوران وزیر داخلہ نے پاک امریکا تعلقات کے فروغ کے لیے امریکی سفیر ڈونلڈ بلوم کی خدمات کو سراہا اور ان کے لیے نیک خواہشات کا اظہار کیا۔
الوداعی ملاقات میں امریکی سفیر کی جانب سے پاکستان میں حالیہ دہشتگردی کے واقعات کی مذمت کی گئی۔
