ترجمان کے الیکٹرک کا کہنا ہے کہ نیپرا نے ماہانہ فیول چارج ایڈجسٹمنٹ کی درخواست پر اپنا فیصلہ جاری کردیا ہے۔
کے-الیکٹرک نے اپنے صارفین کے لیے نیشنل الیکٹرک پاور ریگولیٹری اتھارٹی (نیپرا) کے فیصلے کے تحت جنوری 2025 کے بلوں میں 0.492 روپے فی یونٹ کی رعایت کا اعلان کیا ہے۔ یہ فیصلہ اکتوبر 2024 کے عارضی فیول چارج ایڈجسٹمنٹ (FCA) کے تحت کیا گیا ہے۔
ترجمان کے-الیکٹرک کے مطابق فیول چارج ایڈجسٹمنٹ کا تعین بجلی کی پیداوار میں استعمال ہونے والے ایندھن کی عالمی قیمتوں میں تبدیلی اور جنریشن مکس میں فرق کی بنیاد پر کیا جاتا ہے۔ ایندھن کی قیمتوں میں کمی کا فائدہ صارفین کو منتقل کیا جاتا ہے، جبکہ نیپرا کی منظوری کے بعد ان اخراجات کو صارفین کے بلوں میں شامل کیا جاتا ہے۔
ریگولیٹری فیصلے کے مطابق، یہ رعایت تمام صارفین کی کیٹیگریز پر لاگو ہوگی، سوائے الیکٹرک وہیکل چارجنگ اسٹیشنز (EVCS)، لائف لائن صارفین، پری پیڈ میٹرنگ، اور زرعی صارفین کے۔ نیپرا اتھارٹی صارفین کے بلوں پر وصولی کی رقم کا تعین کرتی ہے، جس کا نوٹیفکیشن وفاقی حکومت جاری کرتی ہے۔
صارفین اس کمی سے جنوری 2025 کے بلوں میں فائدہ اٹھا سکیں گے، جو ایندھن کی قیمتوں میں کمی کے باعث ممکن ہوا ہے۔
