اشیائے خورونوش اور سامان رسد پر مشتمل گاڑیوں کا پہلا قافلہ آج پارا چنار کے لیے روانہ ہوگا۔
پشاور: اشیائے خورونوش اور ضروری سامان سے لدے قافلے کا پہلا کاروان آج پارا چنار کے لیے روانہ ہو گا۔ سرکاری ذرائع کے مطابق یہ قافلہ 4 جنوری 2025ء کو ڈپٹی کمشنر پر فائرنگ کے واقعے کے بعد روک دیا گیا تھا، تاہم اب اسے مکمل سیکیورٹی کے ساتھ بھیجا جا رہا ہے۔
قافلے کی حفاظت پولیس کے ذمہ ہوگی، جبکہ کسی بھی ہنگامی صورتحال سے نمٹنے کے لیے دیگر قانون نافذ کرنے والے ادارے بھی الرٹ رہیں گے۔
واضح رہے کہ یکم جنوری کو ہونے والے امن معاہدے کے تحت قائم کی گئی امن کمیٹیوں نے علاقے میں امن و امان کی ضمانت دی ہے۔ مقامی رہنماؤں نے ذاتی اور قبائلی تنازعات کو بالائے طاق رکھ کر عوام کی مشکلات کم کرنے کے لیے کردار ادا کیا ہے۔
80 دنوں سے جاری سڑکوں کی بندش کے باعث کرم کے عوام کو بنیادی ضروریات اور ادویات کی شدید قلت کا سامنا تھا۔ اب قافلے کی روانگی سے ان مسائل میں کمی آئے گی۔
امن معاہدے کے تحت مقامی لوگوں نے 15 دن کے اندر ریاست کو اسلحہ جمع کروانے اور ایک ماہ کے اندر تمام مقامی بنکرز کے خاتمے کا وعدہ کیا ہے، جو علاقے میں پائیدار امن کے قیام کے لیے اہم پیش رفت ثابت ہوگی۔
