وزیر اعلیٰ پنجاب مریم نواز نے سرکاری زمینوں پر قابض مافیا کے خلاف گرینڈ آپریشن کا حکم دے دیا۔
لاہور، وزیر اعلیٰ پنجاب مریم نواز شریف کی جانب سے صوبے بھر میں سرکاری زمینوں پر قابض مافیا کے خلاف گرینڈ آپریشن کا حکم دے دیا گیا۔
مریم نواز نے کسی بھی دباؤ اور سیاسی اثر کو خاطر میں لائے بغیر سرکاری زمینیں واپسی کرانے کی ہدایت کر دی۔
وزیراعلیٰ پنجاب کی ہدایت پر محکمہ جنگلات نے پولیس کے ساتھ تحصیل خانپور میں بڑی کارروائی کر کے 90 ایکڑ اراضی واگزار کرالی۔
کارروائی کے دوران قبضہ مافیا نے محکمہ جنگلات کی ٹیم پر حملہ کر کے نقدی اور موبائل فون چھین لئے، سرکاری گاڑی جلانے کی بھی کوشش کی، ٹریکٹر کی بیٹری بھی نکال لی۔
پولیس کی جانب سے با اثر ملزمان کے خلاف مقدمہ درج کر کے گرفتاری کیلئے چھاپے مارنا شروع کردیئے گئے ہیں۔
سینئر صوبائی وزیر مریم اورنگزیب نے قبضہ مافیا سے سرکاری زمینیں واگزار کرانے پر محکمہ جنگلات اور پولیس ٹیم کی کارکردگی کو سراہتے ہوئے کہا کہ سرکاری زمینوں کا تحفظ حکومت کا فرض ہے، محکمہ جنگلات کی تمام زمین واپس لیں گے، عوام کے تعاون سے آپریشن کامیاب ہوگا۔