اسلام آباد، وفاقی وزیرِ تعلیم ڈاکٹر خالد مقبول صدیقی کی جانب سے دعوٰی کیا گیا ہے کہ مدارس کی رجسٹریشن کے حوالے سے سربراہ جے یو آئی مولانا فضل الرحمان کے ہاتھ کچھ نہیں آیا۔
نجی ٹی وی چینل کے پروگرام میں گفتگو کے دوران ڈاکٹر خالد مقبول صدیقی کا کہنا ہے کہ مدارس کی رجسٹریشن کا معاملہ ابھی تک وزارتِ تعلیم کے تحت ہے، رجسٹریشن اب تک وزارتِ صنعت کو منتقل نہیں ہوئی جب کہ مدارس کی رجسٹریشن سے متعلق مولانا فضل الرحمان کے ہاتھ کچھ نہیں آیا۔
سینئر رہنما ایم کیو ایم نے کہا کہ پاکستان کا بحران 2024 کے الیکشن کے باعث نہیں 2018 کے الیکشن کی وجہ سے ہے، سیٹیں 24 سے 7 کرنے کے باوجود ایم کیو ایم کی افادیت میں فرق نہیں پڑا۔
واضح رہے کہ چند روز پہلے صدر پاکستان آصف زرداری نے مدارس کی رجسٹریشن کے حوالے سے سوسائٹی ایکٹ رجسٹریشن بل پر دستخط کیے تھے جس کے بعد قومی اسمبلی سیکرٹریٹ نے بل کا گزٹ نوٹیفکیشن بھی جاری کر دیا تھا۔
نئے قانون کے مطابق مدارس کو یہ حق حاصل ہوگا کہ وہ خود کو سوسائٹیز رجسٹریشن یا وزارت تعلیم کے تحت رجسٹر کرائیں۔
قومی اسمبلی کے ترجمان کا بتانا ہے کہ سوسائٹیز رجسٹریشن ترمیمی ایکٹ بل 20 اکتوبر کو سینیٹ اور 21 اکتوبر کو قومی اسمبلی سے منظور ہوا تھا، مدارس کی رجسٹریشن کا معاملہ باہمی افہام و تفہیم سے حل کیا گیا ہے۔
