اسلام آباد،صدر مملکت آصف علی زرداری اور وزیراعظم شہباز شریف کی جانب سے عالمی برادری سے مطالبہ کیا گیا ہے کہ بھارت کو کشمیر میں انسانی حقوق کی خلاف ورزیوں سے روکے۔
کشمیریوں کے یوم حق خودارادیت پر اپنے پیغام میں صدر مملکت آصف علی زرداری نے کہا کہ 5 جنوری 1949 کو کشمیریوں کے حق خوداریت کی قرارداد منظورہوئی تھی، بھارت نے 7 دہائیوں سے کشمیری عوام کوحق سے محروم رکھا ہوا ہے۔
آصف زرداری نے کہا کہ بھارت مقبوضہ جموں وکشمیرکے آبادیاتی اورسیاسی ڈھانچے کو تبدیل کر رہا ہے، عالمی برادری کشمیریوں کو حق ِخود ارادیت دلانے کی ذمہ دار ہے۔
صدر مملکت نے کہا کہ عالمی برادری بھارت کو کشمیر میں انسانی حقوق کی خلاف ورزیوں سے روکے، پاکستان کشمیری عوام کی سیاسی، سفارتی اوراخلاقی حمایت جاری رکھے گا۔
دوسری جانب وزیراعظم پاکستان شہباز شریف کا کہنا ہے کہ ہرسال 5 جنوری، کشمیریوں کے ” یومِ حق خود ارادیت ” کے طور پر منایا جاتا ہے، کشمیری عوام سات دہائیوں سے خودارادیت کے حق کو استعمال نہیں کر سکے۔
شہباز شریف نے کہا کہ آج وقت ہے کہ اقوام متحدہ سمیت عالمی برادری اپنے وعدوں پر عمل کرے اور ایسے اقدامات اٹھائے جائیں جن سے کشمیری عوام حق خودارادیت کااستعمال کرسکیں۔
عالمی برادری کشمیری عوام کے بنیادی حقوق اور آزادیوں کی بحالی کا بھی مطالبہ کرے۔