لاہور، وزیر اطلاعات پنجاب عظمیٰ بخاری نے کہا کہ خیبر پختونخوا حکومت کی صوبے میں رٹ ختم ہو چکی ہے۔
لاہور سے جاری اپنے ایک بیان میں سینئر صوبائی وزیر عظمیٰ بخاری نے کہا کہ امن معاہدے کے باوجود ڈپٹی کمشنر پر حملہ قابل مذمت ہے، کچھ قوتیں کرم میں امن قائم نہیں ہونے دینا چاہتی۔
عظمیٰ بخاری نے کہا کہ خیبر پختونخوا حکومت کی صوبے میں رٹ ختم ہوگئی ہے، صوبائی حکومت کا فوکس صوبے پر کم اڈیالہ جیل کے قیدی پر زیادہ ہے، علی امین گنڈا پور کو دو ماہ میں ایک مرتبہ بھی کرم جانے کی توفیق نہیں ہوئی۔
وزیر اطلاعات پنجاب نے کہا کہ مریم نواز پنجاب بیٹھی ہیں لیکن ان کو پارا چنار کے بہن بھائیوں کی فکر ہے، تحریک انصاف کے پی میں 12 سال سے اقتدار میں ہے، 12 سالوں میں کے پی کے عوام معیار زندگی کا گراف مزید نیچے گیا۔
صوبائی وزیر اطلاعات نے کہا کہ خیبرپختونخوا میں امن و امان، دہشتگردی اور بیروزگاری بنیادی مسائل ہیں، پی ٹی آئی نے پشتونوں کو احساس محرومی کے علاوہ کچھ نہیں دیا۔
دوسری جانب صدر مملکت آصف علی زرداری اور وزیراعظم شہباز شریف کا کہنا ہے کہ امن دشمنوں کو ان کے مذموم مقاصد میں کامیاب نہیں ہونے دیں گے۔
نجی ٹی وی چینل کے مطابق صدر مملکت آصف علی زرداری کی جانب سے کرم میں فائرنگ کے واقعہ کی شدید الفاظ میں مذمت کی گئی ہے، آصف زرداری نے ڈپٹی کمشنر اور دیگر زخمیوں کی جلد صحتیابی کیلئے دعا کی اور امن دشمنوں کیخلاف سخت کارروائی پر زور دیا۔
