اسلام آباد، صدر مملکت آصف علی زرداری اور وزیراعظم شہباز شریف کا کہنا ہے کہ امن دشمنوں کو ان کے مذموم مقاصد میں کامیاب نہیں ہونے دیں گے۔
نجی ٹی وی چینل کے مطابق صدر مملکت آصف علی زرداری کی جانب سے کرم میں فائرنگ کے واقعہ کی شدید الفاظ میں مذمت کی گئی ہے، آصف زرداری نے ڈپٹی کمشنر اور دیگر زخمیوں کی جلد صحتیابی کیلئے دعا کی اور امن دشمنوں کیخلاف سخت کارروائی پر زور دیا۔
صدر زرداری نے کہا کہ عوام کے دشمن شرپسند عناصر فساد پھیلانا چاہتے ہیں، شرپسند عناصر کو ان کے مذموم مقاصد میں کامیاب نہیں ہونے دیں گے۔
وزیراعظم نے بھی لوئر کرم کے علاقے بگن میں سرکاری گاڑیوں کے قافلے پر فائرنگ کی شدید مذمت کی، وزیراعظم پاکستان نے ڈپٹی کمشنر جاوید اللہ محسود سمیت زخمیوں کے لئے صحتیابی کی دعا کی۔
شہباز شریف نے کہا کہ امن معاہدے کو نقصان پہنچانے کی کوشش کی گئی ہے، امن و امان میں خلل ڈالنے والوں اور انسانیت کے دشمنوں کو کامیاب ہونے نہیں دیں گے، حکومت اور سکیورٹی فورسز دہشتگردوں کے خلاف سرگرم عمل ہیں۔
دوسری جانب سینئر رہنما و رکن قومی اسمبلی ایم کیو ایم پاکستان ڈاکٹر فاروق ستار کا کہنا ہے کہ سندھ میں بدعنوانی اور کرپشن عروج پر ہے، موجودہ حکومت نے اپنے ہی ریکارڈ توڑ دیئے ہیں۔
