لاہور، پاکستان شوبز انڈسٹری کی معروف اداکارہ دانیہ انور کا کہنا ہے کہ دوسری شادی کیلئے بیٹی نے بے حد حوصلہ افزائی کی۔
دانیہ انور حال ہی میں ایک پوڈکاسٹ میں شریک ہوئیں جہاں اداکارہ نے اپنی پہلی شادی، طلاق اور دوسری شادی کے بارے میں کھل کر بات کی۔
اداکارہ نے بتایا کہ ان کی پہلی شادی 19 سال کی عمر میں ہوئی تھی اور یہ شادی 6 سال تک چلی تاہم ان کے پہلے شوہر نشے کے عادی تھے اور ان کے رویے دن بہ دن خراب ہوتے گئے، وہ نہ صرف تشدد کرتے بلکہ ان کی تضحیک بھی کرتے تھے جس کی وجہ سے انہوں نے اس رشتے کو ختم کرنے کا فیصلہ کیا۔
اداکارہ نے کہا کہ طلاق کے بعد انہوں نے کچھ عرصے کے لیے دوبارہ شادی نہ کرنے کا سوچا لیکن جلد ہی ان کی زندگی میں ایک اچھا شخص آیا جن سے ان کا 2 سال تک تعلق رہا۔
اداکارہ کی جانب سے انکشاف کیا گیا کہ ان کی بیٹی نے دوسری شادی کے لیے ان کی حوصلہ افزائی کی، دوسری شادی نہ صرف اپنی خوشی بلکہ بچوں کی بھلائی کے لیے بھی کی۔
اداکارہ نے یہ بھی بتایا کہ ان کی عمر اب 37 سال ہے اور وہ اپنی زندگی میں سکون اور خوشی محسوس کرتی ہیں کیونکہ ان کی ساس اور سسر بھی بہت اچھے ہیں جو انکی بہت رہنمائی بھی کرتے ہیں۔
واضح رہے کہ کچھ دن پہلے نجی ٹی وی چینل کے پروگرام میں دانیہ انور کی جانب سے انکشاف کیا گیا تھا کہ وہ مشہور فلمی اداکار ندیم بیگ کی بہو اور فرحان بیگ کی زوجہ ہیں۔
