پشاور، سیکرٹری اطلاعات پی ٹی آئی وقاص اکرم شیخ کا کہنا ہے کہ خان کو سزا ہو بھی جاتی ہے تو مذاکرات کا عمل جاری رہے گا، مذاکرات میں جو مطالبات پیش کئے گئے ہیں سول نافرمانی تحریک ان سے مشروط ہے۔
وقاص اکرم شیخ نے پریس کانفرنس کے دوران کہا کہ ہم سے سول نافرمانی تحریک سے متعلق پوچھا جا رہا ہے، سول نافرمانی تحریک کی کال عمران خان کی طرف سے تھی۔
وقاص اکرم نے کہا کہ سول نافرمانی تحریک کا پہلا فیز جاری ہے، سول نافرمانی کی تحریک بیرون پاکستانیوں کے لیے ہے، بیرون ممالک پاکستانیوں کے اہل خانہ کو دھمکیاں دی جا رہی ہیں، 3 مہینوں میں معلوم ہو جائے گا کہ سول نافرمانی تحریک کے کیا اثرات ہیں۔
رہنما پی ٹی آئی کا کہنا ہے کہ سول نافرمانی کی تحریک ملک نہیں بوگس حکومت اور نااہل وزیر اعظم کے خلاف ہے، عمران خان کو معلوم ہے سول نافرمانی تحریک سے لوگوں کو مشکلات ہیں۔
سیکرٹری اطلاعات پی ٹی آئی نے کہا کہ جن کے پاس عوامی مینڈیٹ نہیں انہیں حکومت دے دی گئی، انسانی حقوق کی خلاف ورزی کی گئی، سول کا ملٹری ٹرائل کیا گیا۔
وقاص اکرم شیخ نے کہا کہ تحریک انصاف مسلح تنظیم نہیں یہ ملک کی بڑی سیاسی جماعت ہے، سول نافرمانی تحریک کی نہ واپسی ہے نہ لچک دکھائیں گے، مذاکرات میں جو مطالبات پیش کئے گئے ہیں سول نافرمانی تحریک ان سے مشروط ہے۔
