لاہور، صوبائی وزیر اطلاعات عظمیٰ بخاری کا کہنا ہے کہ اگر بلوائیوں کو ریلیف ملے گا تو ملک میں بار بار 9 مئی جیسا سانحہ ہوگا۔
لاہور میں پریس کانفرنس کے دوران صوبائی وزیر اطلاعات عظمیٰ بخاری نے کہا کہ ایک طرف آپ معافی نامہ دیتے ہیں دوسری طرف یہ باہر نکل کر غلط زبان استعمال کررہے ہیں، ان کا وہی جذبہ ہے، یہ 9 مئی دوبارہ دہرانے کیلئے تیار ہیں، ان کو تو معافی نہیں ملنی چاہیے۔
سینئر صوبائی وزیر نے کہا کہ سوال یہ ہے کیا ان کو کسی رعایت کا مستحق ہونا چاہیے؟ خیبر پختونخوا کے وزیراعلیٰ ہاؤس میں فسادیوں کے اعزاز میں تقریب ہوتی ہے، ان فسادیوں کو وہاں ہلہ شیری اور شاباش دی جاتی ہے، ان کو کہا جاتا ہے ویری گڈ بڑا کارنامہ سرانجام دیکر آئے ہو۔
عظمیٰ بخاری کا کہنا تھا کہ جو گڑگڑا کر معافیاں مانگ کر باہر آئے ہیں ان کو دوبارہ ملک میں آگ لگانے کا کہا جارہا ہے، ان کے تاثرات پاکستان میں دوبارہ آگ لگانے کیلئے نظر آرہے ہیں، ایسے لوگوں کو معافی نہیں ملنی چاہیے، آنے والے دنوں میں کسی کا ریلیف بنتا تھا تو لگتا ہے ان کے دروازے بند کیے جارہے ہیں۔
ن لیگی رہنما کا کہنا ہے کہ ان فسادیوں کیلئے یہ رعایت پاک فوج کی طرف سے آئی ہے، ان کو بھی دوبارہ سوچنا پڑے گا، معافی اس کو ملتی ہے جو معافی مانگ رہا ہو، سابق وزیراعظم نے کبھی اپنے اعمال پر معذرت نہیں کی، بانی پی ٹی آئی نے زندگی میں بڑے گناہ کیے وہ شرمندہ نہیں ہوئے۔
عظمیٰ بخاری کا کہنا تھا کہ تحریک انصاف والے جھوٹ بہت بولتے ہیں، تحریک انصاف والے آسانی سے کہہ دیں گے کہ کوا سفید ہوتا ہے، الزام لگا کر مظلوم بنتے ہیں پھر ہیرو بن کر سوشل میڈیا پر مشہور ہوتے ہیں، ان کی باتوں کو اتنا سیریس نہیں لینا چاہیے۔
سینئر صوبائی وزیر کا کہنا تھا کہ عمران خان جیل میں بھنے ہوئے دیسی مرغے، ڈرائی فروٹ کھاتے ہیں، بانی پی ٹی آئی کی خدمت میں پیش کرنے کیلئے کیا رہ گیا ہے، انہوں نے ہر چیز میں سیاست کرنی ہے، ان کا کوئی معاملہ جیل ریفارم کا نہیں، خیبرپختونخوا میں جیلیں ٹوٹتی ہیں، وہاں کسی کی نظر نہیں جاتی۔
