اسلام آباد، وفاقی وزیر احسن اقبال کا کہنا ہے کہ کسی بھی ملک کی ترقی کا دارومدار اس کے عوام کی ذہنی صحت پر ہوتا ہے۔
وفاقی وزیر احسن اقبال نے اسلام آباد میں ذہنی صحت سے متعلق ایک بین الاقوامی کانفرنس سے خطاب کے دوران ملک کی ترقی میں ذہنی صحت کی اہمیت پر زور دیتے ہوئے کہا کہ جسمانی صحت کے ساتھ ساتھ ذہنی صحت بھی انتہائی اہم ہے، اس کمی کو پورا کرنے کے لئے فوری اقدامات اٹھانے کی ضرورت ہے تاکہ ذہنی صحت کے مسائل سے نمٹنے کے لیے ایک مضبوط اور مؤثر نظام قائم کیا جاسکے۔
احسن اقبال کی جانب سے ڈیجیٹل مردم شماری کے حوالے سے بتایا گیا کہ پاکستان کی آبادی میں تیزی سے اضافہ ہو رہا ہے، جو وسائل پر دباؤ ڈال رہا ہے، وفاقی وزیر نے کہا کہ کسی بھی ملک کی ترقی کا انحصار وہاں کے لوگوں کی ذہنی صحت پر ہوتا ہے، جسمانی صحت کے ساتھ ساتھ ذہنی صحت پر بھی توجہ دینا انتہائی ضروری ہے۔
احسن اقبال نے کہا کہ ملک میں 24 کروڑ کی آبادی کے لئے صرف 900 ماہر نفسیات موجود ہیں، جسے بڑھانے کی ضرورت ہے، وفاقی وزیر نے معاشرے میں نفرت، تعصب، اور انتہا پسندی جیسے منفی رویوں کے خاتمے پر زور دیا، جو قوم کی ذہنی صحت اور ملکی استحکام کے لیے خطرہ ہیں۔
دوسری جانب رہنما مسلم لیگ ن اور سینیٹر عرفان صدیقی کا کہنا ہے کہ پی ٹی آئی ارکان کا عمران خان سے ملاقات کا مطالبہ جائز ہے، پی ٹی آئی ارکان کی بانی سے مشاورت پر ہمیں کوئی اعتراض نہیں۔
