اسلام آباد، رہنما مسلم لیگ ن اور سینیٹر عرفان صدیقی کا کہنا ہے کہ پی ٹی آئی ارکان کا عمران خان سے ملاقات کا مطالبہ جائز ہے، پی ٹی آئی ارکان کی بانی سے مشاورت پر ہمیں کوئی اعتراض نہیں۔
پارلیمنٹ کے باہر میڈیا سے گفتگو کے دوران سینیٹر عرفان صدیقی کا کہنا ہے کہ مذاکراتی کمیٹیوں کی خوشگوار ماحول میں بات چیت ہوئی، ہماری توقع تھی آج تحریری مطالبات لے کر آئیں گے۔
سینیٹر عرفان صدیقی نے بتایا کہ پی ٹی آئی ارکان نے کہا عمران خان سے ملاقات کرائی جائے، ہم نے پی ٹی آئی ارکان سے بانی پی ٹی آئی سے ملاقات کے لیے سہولت فراہم کرنے کا کہا ہے، ہم توقع رکھتے ہیں اگلی نشست میں تحریری مطالبات لے کر آئیں گے۔
سینیٹر نے کہا کہ مذاکرات کا جاری رہنا بھی ایک بڑی پیشرفت ہے، مذاکرات ایک ہفتہ آگے کرنا حکومت نہیں تحریک انصاف کا مطالبہ ہے، ہم نے پی ٹی آئی ارکان سے کوئی مطالبہ نہیں کیا، پی ٹی آئی ارکان نے الیکشن، 26 ویں ترمیم سے متعلق کوئی بات نہیں کی۔
سینیٹر عرفان صدیقی کا کہنا ہے کہ کیس جرائم کی نوعیت پر بنتے ہیں، 26 نومبر کو واقعات ہوئے اس لیے کیسز بنے، ایسی کوئی ضمانت نہیں دی جاسکتی کہ کسی پر کوئی کیس نہیں بنے گا۔
دوسری جانب سابق وزیراعظم اور پیپلز پارٹی کے مرکزی رہنما راجہ پرویز اشرف کا کہنا ہے کہ اس وقت مذاکراتی کمیٹی کا ماحول بہتر ہے، وقت آنے پر آصف علی زرداری، نواز شریف اور عمران خان بھی بیٹھ سکتے ہیں۔
