کراچی، اینٹی نارکوٹکس فورس (اے این ایف) کی جانب سے مختلف کارروائیوں کے دوران منشیات سمگلنگ میں ملوث خاتون سمیت 3 ملزمان کو حراست میں لے لیا گیا۔
ترجمان کا بتانا ہے کہ اے این ایف کا ملک کے مختلف شہروں میں منشیات سمگلنگ کے خلاف کریک ڈاؤن جاری ہے، اے این ایف کی جانب سے 5 کارروائیوں میں خاتون سمیت 3 ملزمان کو گرفتار کیا گیا، جن کے قبضہ سے 20 کروڑ 90 لاکھ سے زائد مالیت کی 287.740 کلوگرام چرس برآمد ہوئی۔
اے این ایف حکام کے مطابق ہزار گنجی کوئٹہ کے غیر آباد علاقے سے 231 کلو گرام مارفین جبکہ لسبیلا کے علاقے گوٹھ لکھا اوتھل کے قریب سے 35 کلو افیون، 12 کلو آئس اور 6 کلو ہیروئن برآمد ہوئی۔
حکام کے مطابق کارروائیوں کے دوران ایم ون موٹر وے اسلام آباد کے قریب گاڑی کے خفیہ خانوں میں چھپائی گئی 3 کلو آئس برآمد کی گئی جبکہ اقبال شہید ٹول پلازہ اٹک کے قریب دو کارروائیوں میں خاتون سمیت ملزم سے 740 گرام آئس برآمد کی گئی۔
اینٹی نارکوٹکس فورس کے ترجمان کے مطابق گرفتار ملزمان کے خلاف مقدمہ درج کرکے تحقیقات کا آغاز کر دیا گیا ہے۔
